Nongstoiñ, Nailar:
Ka Federation of Khasi Jaiñtia & Garo People (FKJGP) Lai Lyngdoh Area unit ka la pynrem jur halor ka jingjia shah thang ka kali jong ka kompeni ba shna ïa ka surok Nongstoiñ-Wahkaji ha kawei na ki jaka sah ha Mawthungkper.
Katkum ka kyrwoh khubor na u President ka seng u Bah Nestor Nongkseh, ka pynrem jur halor ka jingshah thang ka trok dumper ha Mawthungkper ha ki ‘riew shim kabu ki bym pat lah ban tip la ki dei kiei.
“Ka FKJGP ka pynpaw ïa ka jingsngewdiaw bad ym lah ban pdiang ïa kum kane ka jingleh riewkhlaw da lei-lei ruh em hapoh ka thaiñ namar kumba ngi ïohi mynta ba kane ka kompeni ka dang pyntrei ïa ka surok kaba pynïasoh ïa ka Nongstoiñ sha Wahkaji,” la ong u Bah Nongkseh.
Shuh shuh u la ong ruh ba katei ka jingleh riewkhlaw jong ki ‘riew shim kabu bad lada kan ïai jia kumne, ka lah ban wanrah ka jingthut ha ka jingtrei ïa ka surok bad ka jingduhnong kan long hi ïa ki paidbah.
U la ong ruh ba ka FKJGP ka kyntu ïa ki bor jong ka aiñ ban wad bad thwet ïa kine ki briew kiba leh ïa kane ka kam bad ban wad ïa ka daw namar ka lah ban dei ki daw ba bun rukom la ki dei ki trai shnong ne ki briew kiba na ka kompeni hi kiba leh ïa kane.
Ka FKJGP ka kyntu ruh ïa ki nongshong shnong ba lada ki lap ïa kano-kano ka jingduna jong kane ka kompeni ba kin leit mih ban ïakren bad pynbeit khnang ba ki kam kin ïaid beit ïaid ryntih. Ka seng ka thrang ruh bha ba kane ka kam shna surok kan ïaid shaid-shaid khnang ba kan dep noh bad kan long ka jingkyrkhu ïa ki paidbah.
