Shillong, Nailar 09:
Ka seng National People’s Party (NPP) kaba ïalam ïa ka sorkar hapoh ka jylla ka dei ka seng kaba hakhmat kaba bun tam ki nongthep vote hapoh ka Shillong Constituency ha ka ilekshon MP Lok Sabha ban sa long la shem snem ha u 2024 lada kheiñlang ïa baroh 36 tylli ki constituency ha kane ka ilekshon MLA ba dang shu dep ha u Rymphang, 2023.
Katba ka UDP kaba synroplang ha ka sorkar jylla ka dei ka seng kaba wan ba ar ha jingbun ki nongthep vote. Ka INC kaba dei ka seng saiñ pyrthei kaba la slem hapoh ka jylla kaba la bat bun snem ïa ka jingsynshar hapoh ka jylla ka la wan balai. Ka VPP kaba dei ka seng saiñ pyrthei ba dang shu mih thymmai ha kane ka ilekshon MLA ka la wan ba saw, ka BJP kaba synshar ïa ka sorkar ha baroh ka ri India ka la wan ba san, ka HSPDP kaba la slem hapoh ka jylla ka wan ba hynriew bad ka TMC kaba dang shu wan ïuhkjat thymmai ha ka jylla ka la wan ba hynñiew.
Kane ka jingkheiñ ïa ki jingïoh vote ki seng saiñ pyrthei ka long beit thik ïa ki 36 tylli ki constituency kiba hap ha ka Shillong constituency ha ka ilekshon MP Lok Sabha ban sngewthuh kumno ki seng saiñ pyrthei haba ki thmu ban pynkhreh ïa kane ka ilekshon ka ban long la shem snem.
Ka NPP kaba don 8 ngut ki MLA ka ïoh 3,14,120 vote, ka UDP kaba don 12 ngut ki MLA ka ïoh 3, 00,529 vote, ka INC kaba don 4 ngut ki MLA bad kaba don ruh ïa u MP Lok Sabha ba mynta Bah Vincent H Pala ka ïoh 1, 79,680 vote, ka VPP kaba don 4 ngut ki MLA ka ïoh 1,01,264 vote, ka BJP kaba don 2 ngut ki MLA ka ïoh 81,842 vote, ka HSPDP kaba don 2 ngut ki MLA ka ïoh 58,051 vote bad ka TMC kaba don tang uwei u MLA ka ïoh 48,320.
Kane ka jingkheiñ ïa ka jingïoh vote jong ki seng saiñpyrthei la shim kyllum katkum ka jingpynmih da ka tnad ilekshon jong ka jylla kaba lah ban duna ne tam. Hynrei ban pynthikna shuh shuh ki seng saiñpyrthei ki lah ban kheiñ biang sa shisien ïa ka jingïoh vote ki kyrtong jong ki.
Kane ka jingwanrah ïa ka jingïoh vote ki seng saiñpyrthei ha ka ilekshon MLA ba dang shu dep ym dei tang ban pyntip sha ki paidbah kumno ba kin pynkhreh ïa ka ilekshon MLA hynrei ka long ruh shi bynta ban pynkhreh ruh ïa ka ilekshon MDC kaba dei ban long ha u snem 2024 na ka bynta ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC).
Ka NPP kaba ïoh 3,14,120 vote lada kheiñ lang bad ki vote jong ar ngut ki MLA ka PDF kiba la wan pynïasoh sha ka seng NPP, kata jong u Bah Banteidor Lyngdoh na Mawkynrew, Bah Gavin Mylliem na Sohra bad Bah Auspicious Lyngdoh (General Secretary ka PDF) na Mawphlang kaba poi 29,733 vote kan poi baroh sha ka 3,43,853 vote.
Kat haduh mynta ki seng saiñpyrthei kiba la pynpaw ïa ki kyrtong ban ïakhun ïa ka ilekshon MP Lok Sabha ka long tang ka INC ka ban pynïeng biang ïa u MP ba mynta u Bah Vincent H Pala bad ka VPP kaba la dep pynbna ïa u Dr. Ricky Syngkon, katba kiwei ki seng saiñpyrthei kum ka NPP, UDP, BJP, TMC bad HSPDP kim pat ïakren eiei.
