Baghmara, Nailar 09:
Uwei u shipai BSF u la duh noh ïa la jingim hadien ba ma u lem bad u paralok ki la shah thombor ha ki hati khlaw katba ki dang don ha lynti ban leit sha ka jaka ap pahara hajan ka shnong Nilwagre, South Garo Hills ha ka Sngi Balang.
Une u shipai BSF uba la khlad u dei uba la tip kyrteng kum u Vijay Kumar. Katkum ka khubor na ki pulit, u Kumar u la don lang bad uwei u paralok jong u ha ka thuk-thuk katba ki dang don ha lynti ban leit sha Nilwagre Border Outpost na Doomdomma na ka bynta ban pahara ha khappud.
“Ha ka por ba ki la poi ha ka surok khappud kaba don hapdeng ka Rasnagre bad Nilwagre, kitei ki arngut ki la shah thombor ha ki hati khlaw. U Constable Vijay Kumar u la mynsaw bad la rah ïa u da ki nongshong shnong sha Sibbari PHC. Hynrei, u la khlad noh hashwa ban poi sha kane ka PHC,” la ïathuh u SP ka South Garo Hills, u Abraham T Sangma.
Ki pulit ki la pyntip ba katei ka la jia ha ka por kumba 12:30 mynsngi. Ki nongshong shnong jong ka India bad Bangladesh ki la ïa mih ban ai jingïarap ïa utei u shipai BSF uba la mynsaw. Ha ka por mynsngi, la ju plie ïa ki khyrdop ha khappud khnang ba ki nongrep kin ïoh ban leit sha ki lyngkha ki hali jong ki.
Ki khubor ki ïathuh ba ki hati khlaw ki la don hajan khappud hapdeng ka shnong Dalu bad Sibbari bad kiwei pat la kumba ar bnai mynta. Mynshwa, ki la ju don ki ’riew paidbah kiba la mynsaw na ka jingshah thombor ha ki hati khlaw wat la ym pat ju kham don kiba khlad.
Nalorkata, ki hati khlaw ki ju pynjulor ïa ki jingthung jingtep kum u kwai bad kiwei ba la thung da ki nongshong shnong ha khappud.
