Shillong, Nailar 09:
U Myntri Rangbah ka Jylla, u Conrad K Sangma u la pyntip ba u Myntri Rangbahduh ka Ri u Narendra Modi u la kular ban sa shong bishar hi da lade ïa ka kam ba ïadei bad ka Inner Line Permit (ILP), ban pynrung ïa ka ktien Khasi bad Garo ha ka khyrnit ba phra bad kiwei kiwei ki kam ba la pynsngew da ka Sorkar Jylla.
Haba ïakren bad ki lad pathai khubor ha ka sngi Balang, u Conrad u la ong “Ngi la ïakren bad pyntip sha u halor ka jingïakren kaba ïaid halor ka kam pynbeit pud bad u Myntri Rangbah u la pynpaw ïa ka jingsngewkhia halor ki jingjia bapher bapher kiba ïai jia bad balei ba hapoh ka Ri ym lah ban pynbeit noh ïa kane ka kam”.
U Conrad u la pyntip ruh ba “U Myntri Rangbahduh u la ïaroh ïa ki nongïalam jong ka thaiñ shatei lam-mihngi halor ka jingshim ïa ki sienjam ban pynbeit bad pynpaw ba kine ki dei ki jingeh ba khraw bha hynrei wat la katta ki nongïalam jong ki Jylla bapher bapher ki la rah ïakren ïa kane ka kam. U la pynpaw ïa ka jingkmen halor kane bad kular ba un ai ka jingkyrshan ba pura na ka liang ka Sorkar”.
Halor ka jingïakren ïasuk bad ka HNLC, u Myntri Rangbahduh u kwah eh ba kan don ka jingsuk ba neh shirta ha ka Jylla Meghalaya bad u la kyntu ïa ka Sorkar Jylla ba kan jam shakhmat ha kane ka kam bad ban pyrshang ban pynbeit noh kham kloi ïa ki kam ki jam baroh.
Nalor nangta, u Conrad u la ïathuh ba ka kynhun ba u la ïalam na Jylla, ka la pynsngew ruh hakhmat u Myntri Rangbahduh ïa ka jingangnud jong ki nongshong shnong ka Jylla ban pynrung noh ïa ka Ktien Khasi bad Garo ha ka khyrnit ba phra jong ka Riti Synshar ka Ri.
Halor ka jingdawa ILP, u Myntri Rangbah ka Jylla u la pyntip ba ka kynhun ka la pynpaw hakhmat u Myntri Rangbah ka Jylla ïa ka jingangnud jong ki paidbah ka Jylla ban don ïa ki kynja aiñ hapoh ka Jylla ki ban ïada ïa ka bha ka miat bad ki jingmyntoi jong ki nongshong shong ka Jylla, bad kumta la pynpaw ba ka ILP ka dei kawei na ki lynti kaba ka Jylla ka lah ban leh.
“Ha kane ka jingïakynduh, na ka liang jong u Myntri Rangbahduh ka Ri u la shah shkor bha ïa ngi bad u sngewthuh ïa ka jingsngewkhia jong ki paidbah ka thaiñ shatei lam-mihngi bad u la ong ruh ba un sa shong bishar ïa kane ka kam bad un sa ai ktien sha ka Sorkar Jylla nalor ba un sa ïakren ruh bad ka Home Ministry,” la ong u Conrad.
