Shillong, Naitung 09:
U Chairman jong ka Northeast Indigenous People’s Forum u Anup Chetia ha ka sngi Balang u la ban halor ka jingdonkam jong ki nongshong shnong kiba dei ki riewlum ba kin wan shakhmat ban ïatylli kawei ban ïada ïa la ki lariti bad tynrai jong ka thaiñ shatei lam-mihngi.
Haba kren sha ki lad pathai khubor hadien ba la wai ka jingrakhe ïa ka International Day of World’s Indigenous Peoples kaba la long ha NEHU, u Chetia u la ong ba ïa ka jinglong kyrpang jong ka thaiñ shatei lam-mihngi donkam ban ïada na ki bor ba nabar. Ïa kane lah ban kot tang lada baroh ki paid riewlum na ki jaidbynriew bapher bapher kin tylli kawei.
Ha kaba ïadei bad ka jingkynad bad jingjia ha Manipur, u Chetia u la pyntip ba la dep ban bthah bad ai jingmut ïa ki da ki dkhot na Manipur ba kin nym pat wan ïuhkjat ha kane ka jylla ha kum kane ka por namar ki daw kiba bun.
“Ngi la don ka jingthmu bad pynkhreh ban phah ïa ka kynhun sha Imphal, hynrei u Secretary General jong ngi, u la ai jingmut ïa ngi ban nym pat leit ïuhkjat naba kam pat dei ka por kaba biang. Na ka lang ka Manipur Chapter jong ngi, ka la trei shitom ban ïaleh ban wanrah jingsuk ha Manipur bad na ka liang ka jong ngi ruh, ngi la don ka jingïakren bad ki paralok jong ngi kiba dei na ka jaidbynriew Meitei bad kumjuh ruh ki Kuki,” u la ong.
