Tura, Nailar 09:
Kawei ka longkmie ba 32 snem ka rta na Ampati, South West Garo Hills, ka la mynsaw jur hadien ba ka la hap na ka kali kaba dang ïaid hajan ka shnong Rari, North Garo Hills.
Katkum ki khubor, katei ka longkmie ka la mynsaw jur na khlieh bad la kit ïa ka sha Goalpara, Assam ban ïoh jingsumar.
Ki khubor na ki pulit ki ïathuh ba katei ka longkmie ka la shong ha ka bynta ba shakhmat jong ka kali ryngkat bad u kurim. Namar ba ka la sngew king-khlieh, la pynsangeh shwa ïa ka kali bad ka la hiar ban pynpyngngad ïalade.
Ha ka por ba ka la rung biang sha ka kali bad haba la ïaid katto katne, katei ka longkmie ka la ïohthiah noh da kaba shaniah ha ka jingkhang jong ka kali. Hynrei jia ryngkhat ba kata ka jingkhang ka la plie hi ha ka por ba ka kali ka dang khun, bad ka la hap noh sha surok napoh kata ka kali.
Katei ka longkmie ka khlem tip briew shuh namar ka jingmynsaw na ka khlieh bad la kit ïa ka sha Goalpara ban ïoh jingsumar, la ong ka khubor na ki pulit.
