Shillong, Nailar 09:
Ka jingpynsahteng ka Sorkar Pdeng ban pyllait ïa ka pisa kaba dei na ka bynta ki tiar ki tar kiba pyndonkam ban pyntrei ïa ka skhim bylla 100 sngi lane ka National Rural Employment Guarantee Scheme (NREGS) ha kane ka Jylla.
Kiba bun ki Village Employment Council (VEC) kiba long ki nongpyntrei ïa kane ka skhim ka Sorkar Pdeng ki la ud bha namar ka jingbym pyllait pisa ka Sorkar ban siew noh ïa ka bai tiar (materials component) kum ki maw, mawria, shyiap, nar rod, dewbilat bad kiwei kiwei ki tiar kiba pyndonkam haba pyntrei ïa ki projek bapher bapher lyngba kane ka skhim bylla 100 sngi ha ki shnong ki thaw.
Ka tyllong khubor ka ïathuh ba ka Sorkar Pdeng ka la pynsahteng ban pyllait ïa ka pisa bai thied tiar naduh u snem 2021-2022. Katkum ka jingai jingtip na ka Ministry of Rural Development jong ka Sorkar Pdeng, ka pisa ka lah ban lait teng noh mar shiteng lane 50 na ka 100 jong u snem 2021-2022.
“Ngi khmih lynti ba ka pisa kan lait kloi noh bad kan long ka jingmyntoi shibun ban nang lah ban pyntyllun ïa kane ka skhim sha ki jaka nongkyndong kiba dang donkam shibun ki kam pynroi,” la ong kiba peit ïa kane ka skhim.
Ka pisa ka la kot sha ki spah klur tang kaba dei na ka bynta ki tiar bad lada ka Sorkar Pdeng ka kloi ban pyllait noh, kan long ka jingmyntoi ïa ki VEC kiba la ïai ap ban ïoh ïa ka pisa baroh shikatta.
La ong ba ka Sorkar Pdeng ka la pyllait tista tang ïa ka pisa kaba dei ka bainong (wages component) jong ki nongbylla shispah sngi.
Kane ka skhim ka don ar bynta haba ïadei bad ka jingpyllait pisa ka Sorkar Pdeng sha ki Sorkar Jylla kawei ka dei ka bai thied tiar, bad kawei pat ka dei ka bainong sngi ki nongbylla kiba don jobcard.
Ka jingbym pyllait ka Sorkar Pdeng ïa ka pisa ka dei kaba la dep pynsngew ruh ha kine ki khyndiat snem namar kane ka ktah ïa ki briew kiba kloi ban kyrshan ïa ki tiar ki tar na ka bynta ki VEC ba kin pyntrei ïa ki projek.
