Shillong, Nailar 09:
Ka jingshah kem jong ki briew kiba donkti ban kawang maw bad kynshoit ha ka miet jong ka 24 tarik Naitung ha Tura, West Garo Hills, ka la kot sha ka 50 ngut ha ka Sngi Balang.
Mynta ka sngi, u SP ka West Garo Hills, u VS Rathore, u la ïathuh ba ki pulit ki la ïoh kem sa ïa u Dominic A Sangma, 39 snem ka rta, na ka shnong Williampur kaba hap hapoh ka thanat Tikrikilla.
Haba kylli, u SP u la ong ba u Dominic u la shah kem halor ka jingkynnoh ba u la donkti ban kynshoit ïa ki paidbah kiba la kawang maw ïa ka shlem treikam u Myntri Rangbah, u Conrad K Sangma, ha ka miet jong ka 24 tarik Naitung ha kaba shibun ngut ki pulit ki la mynsaw katba ki la don ki kali kiba la julor na ka jingshah kawang maw bad ka jingshah thang.
Napdeng kitei ki 50 ngut, u SP u la ong ba haduh mynta, dang tang uwei uba la ïoh jamin bad uta u dei u Richard Mrong Marak, u nongïalam ka seng Trinamool Congress. U SP u la ong ba u Richard u la ïoh jamin namar um don hapdeng ka met ka phad kaba koit ba khiah.
