Shillong, Nailar 09:
Ka Hynñiewtrep Border Dispute Redressal Forum (HBDRF) ha ka Sngi Balang ka la pynpaw ïa ka jingsngewlyngngoh halor ka jingbym treh leit ïashimbynta jong ka sorkar Meghalaya hakhmat ka kynhun tohkit ne Enquiry Commission ba la khot da ka jylla Assam halor ka jingshah siat ïap jong 5 ngut ki briew ha ka shnong Mukroh.
Haba kren sha ki lad pahthai khubor, u Chairman jong ka HBDRF, u Bah Chandame Sungoh, u la ong ba ka jylla Assam ka la khot haduh lai sien lai wat ïa ka jylla Meghalaya ban ai ïa ki sakhi-satar ha kaba ïadei ka jingjia ha Mukroh, hynrei na ka liang ka jylla Meghalaya ka khlem treh satia ban leh ïa kata.
U Bah Sungoh u la ong ba ka jylla Meghalaya ka la thung ïa la ka jong ka Enquiry Commission halor katei ka jingjia ba la khlieh da u Justice (Retired) T Vaiphei. U la ong ba katkum ka jingïoh jingtip jong ka Forum, na ka liang ka Assam ka la dep ban ai ïa ka kaiphod jong ki sha ka sorkar Meghalaya, hynrei na ka liang ka sorkar Meghalaya pat ka khlem shym leh satia kumta. Kane kan pynlong ïa ki longïing longsem jong kito kiba la duh noh ïa la ki jong ki bahaïing ha katei ka jingjia ha Mukroh ba kin ïoh ïa ka jingbishar kaba hok.
“Kumba ka long mynta, ka pynsah ïa ngi bad ïa kiba bun ha ka umdum namar ba kajuh ka ‘case’, ki don ar tylli ki Commission”, la ong u Bah Sungoh.
Nalor nangta, u Bah Sungoh u la ong ba ha ka kaiphod ba la phah da ka Assam ka la sei haduh lai tylli ki daw kiba ka la pynïeng ïa la ka jong ka nia. Kaba nyngkong ka long ba ka Assam ka la thoh shai ba ka Mukroh ka hap hapoh ka Jrikyndeng Police Station jong ka West Karbi Anglong bad lyngba kane ka la pynpaw shai kdar ba ka jylla Assam ka la kam jubor ïa ka shnong Mukroh, kaba ar ka la ong ba ka jingjia shah siat ïap ki 5 ngut ha Mukroh ka dei na ka daw ka jingwan tuh dieng jong ki napoh u pud u sam ka Assam bad kaba lai ka long ba ka jingjia shah siat ïap ki 5 ngut ka dei namar ba ki la wan ban kerkut ïa ki nongap pahara ka khlaw bad ïa ki pulit kiba don ha kato ka jaka. Kumta ban ïada ïalade kitei pulit ki la hap ban siat ïa kitei ki 5 ngut.
Nalor kata, u Bah Sungoh u la ong ba na ka liang ka Forum ka kwah ban pynshai ba ka shnong Mukroh bad ka jaka ba jia ka jingshah siat ïap ki 5 ngut, kam hap shuh hapoh ka Jrikyndeng Police Station jong ka West Karbi Anglong Assam. Ka Forum ka la ong ruh ba ka daw ba ka la mih ka jingkynad kam dei na ka jingtuh dieng ne u pud u sam, hynrei ka dei na ka jingdon ka khyrdop khrong khajna jong ka Karbi Anglong Autonomous Council.
Namar kata, u Bah Sungoh u la ong na ka liang ka kynhun kan ïeng halor ka nongrim bad ka jingshisha ba kitei ki paradoh parasnam kiba la duh noh ïa la ka jong ka jingim ha katei ka jingjia ki dei ban ïoh ïa ka hok jong ki. U la ong ruh ba lehse kane ka jingsngap jar jong ka jylla Meghalaya halor kane, kan pynduh noh ïa ka hok jong ki lanot kiba mad ïa katei ka jingshah pynïap.
“Ngi kyrpad ruh ïa ka sorkar Meghalaya ba kam dei ban shu sngap halor kane namar ka jingsngap jar ka long kum ka dak jong ka jingïamynjur bad kumba ka ong ka ktien, ka jingsngap jar jong ki briew kiba bha ka pynjot ïa ka ri bad ka jaitbynriew bun shah ban ïa ka jingleh jong ki riewsniew”, la ong u Bah Sungoh.
