Shillong, Nailar 10
U Vice Chancellor ka skulbah North Eastern Hill University (NEHU), u Professor Prabha Shankar Shukla u la ong ba ka nongrim kaba ka skulbah ka ïeng ka long kaba shai halor ka jingpyntreikam ïa ka National Education Policy (NEP), 2020 bad ka la don ka jingmynjur naduh ki Principal bad ki khynnah pule jong ki kolej bapher bapher.
Haba kren sha ki lad pathai khubor ha ka sngi Palei, u Vice Chancellor u la ong ba haduh mynta mynne u khlem ïohpdiang satia ïa kino-kino ki E-mail na ki nongpynïaid ïa ki jaka pule ban ong ba kim kwah ban pyntreikam ïa ka NEP.
“Ka NEHU ka la shim ïa ka sienjam ban ïaid shakhmat ha kaba ïadei bad ka jingpyntreikam ïa ka National Education Policy (NEP) wat lada ki don kumba iwei ne arngut kiba pyrshah, hynrei ym don tang iwei ruh i Principal ba phah wat tang ïa kawei ka E-mail ruh kaba ong ba kim kwah ban pyntreikam ïa ka National Education Policy”, la ong u Vice Chancellor.
Ha kaba ïadei bad ka jingbym treh ban pynlong jong u Vice Chancellor ïa ka jingïalang ba kyrkieh jong ka Academic Council, na ka liang u Vice Chancellor u la ong ba halor kane u la dep ban ai bad kren shai lyngba ki jingthoh ïa baroh ki bynta ba donkam. Nangta, u la ong ba u long uba la pynkhreh ban ïakren bad kino-kino ki kynhun bad u la dep ruh ban ïakren halor kane wat bad ki kynhun sengbhalang kiba kynthup ïa ka KSU, ka NEHU-SU, ka HYC, ka FKJGP bad kiwei kiwei ruh bad ïa kane la leh na ka bynta ka jingbha bad ka jingmyntoi jong ki khynnah samla ka jylla Meghalaya.
Shuh shuh u la ong ruh ha kaba ïadei bad ka synjuk ki nonghikai kaba la tip kum ka Meghalaya College Teacher’s Association (MCTA) lada ki kloi ban wan shakhmat ban ïakren, um artatien ban ïakren bad ki. U la ong ba ka jingthmu jong ki nonghikai bad ka skulbah baroh kawei ka long kaba shai bad ki long ruh kiba la khreh ha kaba ïadei bad kane ka jingpyntreikam ïa ka NEP.
Haba kylli halor ka jingkulmar kaba la mih halor ka jingthmu ban pyntreikam ïa ka NEP, na ka liang u Vice Chancellor u la ong ba kam don kano-kano ka jingbymshai ne ka jingkulmar namar kiei-kiei la dep ban phah lyngba ki jingthoh. Ka jingïakren bad ki lad pathai khubor ruh ka long kaba shai lait noh sa tang katto katne ki bym hun bad mynjur ïa kaei kaba la rai hynrei baroh hi ki ïa mynjur ban pyntreikam ïa ka NEP, 2020. Namar kata, u la ong ba lada ym pyntreikam mynta ïa ka NEP hapoh ka jylla, kaei ka ban jia ha u snem 2036.
