Shillong, Nailar 10
Ki Executive Member (EM) ka Khasi Hills Autonomous District Council (KHADC) hapoh ka jingïalam u Bah Victor Rani uba peit ïa ka tnad Buit-thaw and Lariti bad Bah Rangkynsai Kharbuki ki la leit jurip ïa ka Khasi Heritage Village kaba don ha Mawphlang, East Khasi hills kaba la long mynta ka sngi ka 10 tarik Nailar 2023.
Kane ka jingwan jurip ka long ban pynkhreh ban pynlong biang ïa ka Monolith Festival ha ka taïew ba nyngkong ne taïew ba ar u Nohprah, 2023.
Ha kane ka jingjurip la lap ïa ki ïing trep jong ki hima bapher bapher kiba la sdang synjor bad kiba donkam kyrkieh ban pynbha biang.
Ha kane ka sngi la synranlang u MDC ka thaiñ uba dei u shongknor ka council, u Bah Lamphrang Blah, Bah Carnes Sohshang, Bah Fantin Lakadong kiba dei ki Executive Member (EM), ki ophisar ka KHADC bad ki karikor na PWD bad PHE jong ka sorkar jylla.
Kum ban shu pynkynmaw ka monolith festival kaba long khatduh ka dei ha u snem 2016. Pynban mynta la ïaid 6 snem kane ka tamasa pyni ïa ka riti dustur u Khasi kam shym la long shuh.
Haba ïakren bad u Bah Rangkynsai Makdoh uba dei u EM ka KHADC, u la ïathuh ba ka jingwan ban jurip ïa kane ka Khasi Heritage Village kaba don ha Mawphlang ka long ban pynkhreh pynlong biang ïa ka Monolith Festival ha ka taïew ba nyngkong ne taïew ba ar jong u bnai Nohprah mynta u snem.
U la ïathuh ba haduh mynta um pat tip haduh katno kan lut lada maramot ïa kine ki ïing trep, hynrei ki karikor (engineer) jong ka ophis kin sa wanrah ïa ka kaiphot.
Shuh shuh u la pynpaw ba ka jingpynlong ïa kane ka Monolith Festival ka long ka jingïohnong ïa ka jaidbynriew namar yn pyni nam sha ka pyrthei ïa ka jingriewspah ka riti dustur jong u Khasi.
Katba u Bah Lamphrang Blah uba dei u MDC ka Mawphlang-Diengiei u la ong ba ha kine ki snem man ki Executive Committee ki la pynkhreh ban pynlong ïa ka Monolith Festival hynrei kam shym la urlong. Pynban mynta u snem kane ka jingthmu kan sa urlong.
U la pynkynmaw ba ha kane ka jaka wat u Myntri Rangbahduh ka ri India u Narendra Modi u la dep wan ïuhkjat.
Katba u Bah Victor Rani uba dei ruh u Chairman ka Khasi Heritage Village Management Committee u la pyntip ba kane ka tamasa kan long kaba pynriewspah ïa ka jaidbynriew namar la lah ban pyni ïa ka kolshor u Khasi naduh ki mynbarim.
