Jowai, Nailar 10
Ban weng ïa ka jingïakynad pud kaba dang ïai bteng hapdeng ki Karbi bad ki Khasi Pnar ha ka thaiñ khappud namar ka khyrdop lum khajna kaba la pynïeng da ka Karbi Anglong Autonomous Council (KAAC) ha Khanduli, na ka liang ki Chairman ka Regional Committee (RC) ka Assam bad Meghalaya kin pynlong ka jingleit jurip sha ka shnong Khanduli, West Jaiñtia Hills District hadien ka jingrakhe ïa ka Sngi Laitluid ne Independence Day.
Ïa kane la pyntip da u Myntri Rangbah ka Meghalaya u Conrad K Sangma haba kren sha ki lad pathai khubor ha Ïalong ha ka sngi Palei.
Na ka liang u Myntri Rangbah ka jylla u la pdiang ba kane ka khyrdop lum khajna ka dang don haduh mynta hapoh Khanduli hynrei kam shym la don shuh ka jinglum khajna.
U Conrad u la ong ruh ba ka don khyndiat ka jingkulmar jingmut hapdeng ka Karbi Anglong Autonomous Council (KAAC), ka sorkar Assam bad ka sorkar Meghalaya ha kaba ïadei bad ka jaka ba don katei ka khyrdop lum khajna.
“Ki Chairman jong ki ar Regional Committee ka Assam bad Meghalaya kin pynlong ka jingleit jurip sha ka shnong Khanduli khnang ban weng ïa kane ka jingartatien khnang ban lah ban wanrah pat ïa ka jingsuk ha ki thaiñ Khanduli,” ong u Conrad.
Nalor kata, u Conrad u la ong ruh ba ha ka jingshisha na ka liang u Myntri Rangbah ka Assam bad ka Meghalaya ki don ïa ka jingthmu ban leit jurip sha Khanduli hynrei namar ka jingkhim jong ka por na baroh arliang kumta kim lah ban pynbeit ïa ka tarik na ka bynta kane ka jingleit jurip, bad kumta ki la shaniah ha ki Chairman jong ki Regional Committee ba kin leit jurip sha Khanduli.
