Shillong, Nailar 10
U Myntri ka Development of North Eastern Region (DoNER), u G Kishan Reddy ha ka Sngi Palei u la pyntip ba ka Sorkar Meghalaya ka la dep ban ithuh bad pynbna ïa katto-katne ki ’law kyntang kum ki Community Reserve hapoh ka Wildlife (Protection) Act, 1972.
Ïa kane ka jingtip utei u Myntri ka Sorkar Pdeng u la ai ha ka jubab ba shu thoh ha ïingdorbar thawaiñ Rajya Sabha ha ka Sngi Palei.
Ha kane ka shithi, u Reddy u la ong ba ki bor treikam kum ki Dorbar Shnong ha Meghalaya ki trei ïa ka bynta ba kongsan bha ha ka imlang sahlang bad ka ïoh ka kot ka Meghalaya, nalor ka jingïada ïa ka mei mariang bad pynsngewthuh ïa ki paidbah halor ki jingïada.
Ka dustur kum ka jingpynneh ïa ki ’law kyntang, ka jingkhang ban pynjot palat ïa ka sawdong sawkum kum ki khlaw, ka jingïada ïa ki shyngiar bad kiwei ki tyllong um da ka jingstad, ki aiñ tynrai ba pyrrkhing ïa ka jingleit siat mrad, ki la ïarap bha ban ïada ïa ka mei mariang bad ki jingthaw ba im ha kane ka Jylla.
Nalor nangta, u la ong ba ka skhim ka Sorkar Kmie kum ka Integrated Development of Wildlife Habitats bad ka Compensatory Afforestation Fund Management bad Planning Authority (CAMPA) jong ka Sorkar ka la wanrah ïa ka roi ka par sha ki shnong ki thaw da kaba plie lynti ïa ki ban kamai jakpoh da kiwei ki jait kam.
U la ong ruh ba ki shnong ki thaw bad ki Dorbar Shnong ha Meghalaya ki la ïadonbynta lang ha ki kam ban saiñdur, ban ai jingkyrshan ïa ki Village Employment Council, ban ithuh ïa ki nongïoh jingmyntoi na ki prokram bapher bapher ka Sorkar, ban ai jaka na ka bynta ki projek bad kiwei kiwei, na ka bynta ka roi ka par jong ki jaka riewlum ha ka Jylla.
