New Delhi, Nailar 10 (UNI)
Haba kren skhem ba ka Sorkar Pdeng bad ka sorkar Manipur ki la shim ïa ki sienjam ban wanrah biang ïa ka jingshongsuk shongsaiñ, u Myntri Rangbahduh ka Ri, u Narendra Modi, ha ka Sngi Palei u la pynpaw ïa ka jingkyrmen kaba skhem ba kine ki sienjam kin wanrah ïa u soh bathiang bad ba ka jingsuk kan wanphai sha Manipur kaba la mad ïa ki jingïakynad bad ïaumsnam mynta la palat lai bnai.
Haba jubab halor ka mat jong ka jingbym shaniah shuh ha ka sorkar ba u la ïalam ha Lok Sabha, u Modi u la ai jingkyrmen ïa ki nongshong shnong ka Manipur ba ka Parliament baroh kawei ka don lang bad ki, bad u la ong ba sa tang katto katne por, ka jylla kan sa wanphai biang sha ka lynti jong ka roi ka kiew.
Katba u Modi u dang kren bad jubab, ki MP na ka Liang Pyrshah ki la mih noh na Ïingdorbar Lok Sabha bad ki khlem don satia ha ka por ba u Myntri Rangbahduh u la kren halor ka Manipur.
Na ka liang u Modi u la kynthah ïa ka Liang Pyrshah da kaba ong ba ha ka banyngkong, ka la wanrah ïa ka jingkylli, hynrei ki MP ka Liang Pyrshah kim don satia ka jingïaishah ban shong bad sngap ïa ka jubab jong u.
U Modi u la kren palat ar kynta bad u la ktah halor kiba bun ki mat ki jura bad u la pyrshang ban khyrwit kylla ïa ka Liang Pyrshah bad u la kynnoh ïa ka seng Congress khamtam ïa ki nongïalam jong ka kum u Jawaharlal Nehru bad ka Indira Gandhi ha kaba ïadei bad ki jingeh kiba ktah ym tang ïa ka Manipur, hynrei ka thaiñ Shatei Lam Mihngi baroh kawei.
U Myntri Rangbahduh u la ong ba ka seng Congress bad ka jingleh saiñpyrthei jong ka, ki la long ki daw bah halor ki jingeh ha kane ka thaiñ. U la pynkynmaw ïa kiba bun ki jingjia na ki snem kiba mynshwa bad u la kynnoh beit ba kita ki jingjia ki la mih na ka daw jong ka seng Congress.
“Kata ka jingpang mynsiem jong ki (Liang Pyrshah), ka long da kaba shu jied. Kim lah satia ban pyrkhat shabar na ka jylli jong ka saiñpyrthei,” u la ong.
U la kynnoh ruh ba ka Liang Pyrshah ka sngewtynnad lada ka ïoh lad ban kren sniew shaphang ka Ri. Hynrei u la pynpaw ïa ka jingsngew skhem ba ka sorkar jong u kan sa wanphai biang sha ka bor synshar ha u snem 2024.
Shuh shuh haba kynthoh ïa ka kynhun synrop jong ka Liang Pyrshah ïa kaba la ai kyrteng ‘I.N.D.I.A’, u Modi u la ong ba baroh ki nongïalam ha kane ka kynhun ki don ka jingthrang ban long Myntri Rangbahduh jong ka Ri.
Ha kajuh ka por, u la pyni ïa kita ki jingjop jong ka sorkar ha ki liang bapher-bapher. U la pyndonkam da ki kaiphod jong ka International Monetary Fund (IMF) bad ka NITI Aayog ban kdew ba ka Ri India ka la lah ban pynduna ïa ka jingduk.
U la ban ba ka India kan sa wan ha ka kyrdan ba lai ha ka pyrthei napdeng ki Ri kiba khlaiñ ha ka ïoh ka kot. U la ong ba lada ka Liang Pyrshah ka wanrah ïa ka mat jong ka jingbym shaniah shuh ïa ka sorkar ha u snem 2028, ha kata ka por, ka India kan poi sha katei ka kyrdan.
Shuh shuh u Modi u la kynnoh ba ki seng ha ka Liang Pyrshah ki pynthohbria ïa ka India haba ki leit shabar Ri, hynrei u la ong ba ki paidbah kin ym shah ïalam bakla ha kum kine ki jait kam.
U Myntri Rangbahduh u la kam ruh ba ka sorkar ba u la ïalam ka la ai ïa ka jingsynshar kaba khuid kaba khlem don kano-kano ka jingbamsap bamngem.
Haba kynthoh ïa ka seng Congress, u Modi u la ong ba ka Ri India kam don jingshaniah shuh ha kane ka seng bad kawei ka jylla hadien kawei pat ka la kyntait ïa kane ka seng.
Nalor kitei ki mat ba la kdew haneng, u Myntri Rangbahduh u la kren halor kiba bun kiwei pat.
