Jowai, Nailar 10
U Myntri Rangbah ka Jylla u Conrad K Sangma ryngkat u Symbud Myntri Rangbah u Bah Sniawbhalang Dhar ki la sakhi ïa ka sngi pynkut ïa ka shad Behdienkhlam jong ka Seiñraij Ïalong ha ka 10 tarik mynta u bnai.
Ka lehniam Behdienkhlam jong ka Seiñraij Ïalong ka la sdang naduh ka 8 tarik Nailar da ki jinglehniam bapher bapher ba la pyndep da u Langdoh ryngkat ki Wasan, ki Maji bad u Sangot. Ha kane ka lehniam Behdienkhlam Ïalong la shim bynta da ki lai shnong; ka Wahiajer, Nongkhyllep bad ka Ïalong.
Ki jinglehniam ki kynthup naduh ka Khrong ka Khri, ka Choh Thyndai bad ka Knia Khlam ban beh ïa ka pang ka shitom bad ïa ka sih ka roi na ki shnong ki thaw bad ban kyrpad kyrpon ïa u nongbuh nongthaw ban kyrkhu kyrdoh ban bha ka rep ka riang.
Ha ka sngi pynkut ïa kane ka jinglehniam ki khun ka Seiñraij Ïalong na kylleng ki dong bapher bapher kumjuh ka shnong Wahiajer ki pynpoi haduh 10 tylli ki rot ha pung kyntang kaba la tip kum ka ‘Pyrda’ kaba don ha Ïalong ha ka jingïalang kaba la pynïaid da u President ka Seinraij Ialong u Bah Pyrkhat Shylla.
Nalor u Myntri Rangbah bad Symbud Myntri Rangbah, la donlang ruh ka MLA Saipung ka Kong Santa Mary Shylla, u MLA ka Umroi Bah Damanbait Lamare, u MLA ka Jowai Bah Wailadmiki Shylla, u MLA barim ka Saipung Bah Shitlang Pale, u Chief Executive Member ka JHADC Bah Thombor Shiwat, ki MDC ka JHADC, u Deputy Commissioner ka West Jaiñtia u Bah BS Sohliya, u Superintendent of Police Bah C Syrti, ki doloi na ki elaka bapher, ki ophisar sorkar na ki tnat treikam bapher bapher nalor ki hajar ngut ki paidbah.
Katba ïa ka Knia Khlam bad ka Wahbhang kiba dei ki lehniam ba khadduh la pyndep hadien ka jingbret ïa ki rot.
U Myntri Rangbah haba ai jingkren u la ai khublei bad kitbok kitwriang ïa ki khun ka Seiñraij Ïalong. Ha kaba ïadei bad ka dorkhas kaba la aiti da ka Seiñraij Ïalong kata ban pynbha ïa ka jaka shad Behdienkhlam, ki jaka peit kai ka Tre-Pyrda (Aitnar), ki surok naduh main road shaduh ka jaka jngohkai bad namar kata u Myntri Rangbah u la kular ban theh ki jingïarap.
Hadien ka shad Behdienkhlam haba kren sha ki lad pathai khubor u Myntri Rangbah u la pynbna ban theh jingïarap ïa ka shnong Ïalong lyngba ka skhim Chief Minister Special Development Programme na ka bynta ban tei pynbha bad ïada ïa ki jaka khamtam ïa ki hali ki pynthor ha ka shnong Ïalong.
Nalor nangta, u la ong ba ka wah Myntdu ka la pynjulor ïa ka jaka kaba heh, kynthup ïa ka hali ha ka shnong Ïalong. Kumta u la ong ba un ai jingïarap lyngba ka skhim Chief Minister Special Development Programme ban ïada ïa ka jingpynjulor ka wah.
U la ong ruh ba ka sorkar kan wanrah ïa ki kam pynroi na ka bynta ban pynbha pynmiat ïa ka shnong Ialong bad ka Ialong park.
U la ong shuh shuh ba ka sorkar kan theh jingïarap ban tei ïa ki jingtei ha Pyrda ka shnong Ialong, khnang ban pyndep ïa ka lehniam Behdienkhlam ha ka rukom kaba dei bad ban kyntiew shuh shuh ïa ka kolshor.
