Shillong, Nailar 10
U Bah Thomas Passah u la pynthikna ba un ïakhun beit na ka tiket Khun Hynñiewtrep National Awakening Movement (KHNAM) ha ka ilekshon MDC na Jaïaw konstitwensi ka ban long la shem snem.
U Bah Thomas u dei uwei na ki Working President ka KHNAM uba dei u nongïalam uba la ïaineh naduh kham mynshwa bad mynta ha ka jingïalam u Bah Pyndap Saibon kum u President.
“Haba nga la rung ïing ban pan jingkyrshan, nga la pynthikna ba ngan ïakhun ma nga na ka seng KHNAM na Jaïaw konstitwensi ha kane ka ilekshon MDC ka ban sa long la shem snem” u la ong.
U la pynpaw ka jingsngewkmen ba ki paidbah haduh mynta ki dang ieid ïa ka seng KHNAM kumba ki ieid ha ki por mynshwa.
Katkum ka khubor ba la ïoh lum haduh mynta ki kyrtong kiba la pynpaw pyrthei ban ïakhun ïa ka ilekshon MDC ki long u Bah Auguster Jyrwa uba dei u General Secretary barim ka KSU un ïakhun na ka UDP. Kane ka wan hadien ba u Bah Paul Lyngdoh u MDC ba mynta u la shah jied biang kum u MLA na West Shillong konstitwensi bad shah jied ban long kum u Myntri ha ka sorkar jylla. U Bah Thomas Passah na ka seng KHNAM, ka VPP kaba thikna ban pynïeng kyrtong tangba kam pat pynbna haduh mynta bad kiwei seng saiñpyrthei ki ban sa pynbna ynda la jan ka ilekshon.
Sa kawei ka khubor ba la ïoh lum la ïathuh ba ki don haduh 10 tylli ki konstitwensi kiba la pan tiket na ka KHNAM ban ïakhun ïa ka ilekshon MDC ban long ha u snem 2024.
Na kine 10 tylli ki konstitwensi, kiba kham bun ki dei ki konstitwensi na Shillong bad khapsor.
Kum ban shu pynkynmaw ka KHNAM ka khlem lah ban sei kyrtong ha kine ki snem namar ki kynrum-kynram ïaknieh President hapdeng u Bah Adelbert Nongrum bad u Bah Pyndap Saibon. Pynban naduh ba u Bah Adelbert Nongrum u la leit pynïasoh sha ka VPP, ka KHNAM ka la ïaid beit biang namar ïa ka shuki President la shimti biang da u Bah Pyndap Saibon.
La ïoh khubor ba ym tang ki 10 tylli konstitwesi kiba pan tiket, hynrei kin dang don bun ki samla ban pan tiket na kiwei ki konstitwesi.
