New Delhi, Nailar 10 (UNI)
U Myntri Rangbahduh ka Ri, u Narendra Modi, ha ka Sngi Palei u la pynpaw ïa ka jingsngew skhem ba un wanphai biang sha ka bor synshar hadien ka ilekshon Lok Sabha ka ban long ha u snem ban wan.
Ïa kane, u Modi u la kren haba jubab halor ka mat ba la wanrah da ka Liang Pyrshah ba kam don jingshaniah shuh ha ka sorkar ba la ïalam da u Modi ha Lok Sabha.
U Modi u la kynthoh ba ka kynhun synrop jong ka Liang Pyrshah kaba la tip kum ka I.N.D.I.A kam don lad satia ban jop ha ka ilekshon ban wan namar kane ka kynhun ka dei kaba la tip kum mynshwa kum ka UPA bad kaba la shah pynbudnam shikatdei.
U la kdew ba katei ka kynhun synrop ka don la ki jong ki jong ki saiñpyrkhat bad ki don bun ki nongïalam hapoh ka kynhun kiba don ka jingthrang ban long Myntri Rangbahduh.
Hapdeng ka jingrisa jong ki MP ha ka Liang Synshar, u Modi u la ong ba ka sorkar jong u kan sa wanphai biang sha ka bor hadien ka ilekshon ha u snem 2024.
U la kynthah ïa ka seng Congress bad ki seng kiba ïatreilang bad ka ba ki dei ban pynkhreh ban wanrah ïa ka mat jong ka jingbym shaniah ïa ka sorkar jong u ha u snem 2028 kaba long shi snem shwa ka ilekshon Lok Sabha ha u snem 2029.
“Ha kane ka khep, phi khlem pat da pynkhreh bha, hynrei ngan ai jingmut ïa phi ba phin ïa pynkhreh janai ynda phi la wanrah biang ïa kane ka mat,” la ong u Modi.
U Myntri Rangbahduh u la kam ba lada ka kynhun I.N.D.I.A ka wan ha ka bor, ka Ri kan ïohi sa tang ka jingdum namar kan sa don ka jinghiar ha ka ïoh ka kot katba ki kam ïaumsnam bad ïakynad kin kiew.
Kane ka mat jong ka jingbym shaniah shuh ïa ka sorkar jong u Modi ka la shah rem noh ha ka jingïatynjuh bor. Na ka liang u Lamphang ka Lok Sabha u la phah rah sur ïa ki MP kiba kyrshan bad pyrshah ïa kane ka mat, bad ha kata ka jingrah sur, kiba bun ki dei kiba pyrshah. Ha kajuh ka por, ki MP ka Liang Pyrshah ki khlem don shuh satia hapoh Ïingdorbar Thawaiñ ha ka por ba la pynlong ïa ka jingïatynjuh bor.
