Shillong, Nailar 10
Ka Jylla kam don jingkyrmen shuh ban dang lah tei ïa ki projek pynmih bording na u dewïong lane Thermal Project hadien ba ka North Eastern Electric Power Corporation Limited (NEEPCO) ka la randien noh ban tei ïa ka thermal project kaba 500 megawatts ha Darugiri ha East Garo Hills. Katba kawei ka kompani DS Group kaba la soi ïa ka soskular ban tei ïa ka thermal project kaba 240 megawatts ha Nangalbibra ha South Garo Hills district ka la shu jah noh khlem wan mih shuh.
U Myntri ka tnat bording, u AT Mondal u la ong ba ka jingbymbiang ka lad ban ïoh dewïong ka dei kawei pat ka daw, hynrei ki kompani kiba la soi ïa ka soskular ruh kim shym la ïaid shakhmat ban pyntrei.
U la ong ba ka NEEPCO ka la dep pyntip ba dei ban pynkut noh ïa ka soskular bad ka kham pynleit jingmut noh kumno ban pynmih bording da kiba khuid. U la ong la dep ban ïakren teng ïa kane bad u Chairman and Managing Director (CMD) ka NEEPCO, uba dei ruh u CMD ka NTPC in New Delhi.
U Mondal u la ong ba lada ym lah ban ïoh ka jingshngaiñ ban ïoh beit ïa u dewïong ka lah ban shu long lehnohei ïa kiba bei pisa ban tei projek.
U la ong ba ka kompani DS Group ruh kaba la soi soskular ban tei ïa ka thermal project ha South Garo Hills ka la shu jah khlem wan mih shuh bad ka kam ruh kam ïaid shakhmat.
Haba kylli shaphang ka jingpynmih bording na ki jaboh jabaiñ, u Mondal u la ong ba hadien ba la dep ïakren, ka jaboh jabaiñ ka duna palat bad donkam shibun ka jaboh jabaiñ ban pynlang khnang ban lah ban pynkylla na ka jaboh sha ka bording.
Kum ban pynkynmaw, ki soskular ba la soi hapdeng ka Sorkar Jylla bad kiwei pat ki kompani ki la bun bha ha kine ki khyndiat snem, bad kine ki kompani ki shu kut tang ha kaba soi soskular, khlem pynïaid ïa ka kam shakhmat.
U Mondal u la ong ba ki don katto-katne tylli ki projek kiba shu den ïa ki wah kiba ki paidbah ruh ki pdiang sngewbha tangba ki sahkut noh namar ki kompani pat ki khlem leh eiei. Hynrei ki don pat ki projek kiba ki paidbah ruh ki khang pyrshah bad kim trei ban ïatreilang bad ka Sorkar.
