Shillong, Nailar 11
Wat la ka Voice of the People Party (VPP) kam pat shym la thung ïa ki nongkitkam ha Sohïong-Nongspung konstitwensi, hynrei haduh mynta ki la don lai ngut ki rangbah kiba la phah da ka jingthoh sha u President ka VPP u Bah Ardent M Basaïawmoit ba ki kwah ban long kum u kyrtong ha ka ilekshon MDC na katei konstitwensi ka ban long la shem snem.
Katkum ki khubor kiba la ïoh lum jingtip kaba thikna ki kyrteng kiba la phah sha u Bah Ardent ki long ar ngut ki dei ki nongkyrshan ba radbah jong ka United Democratic Party (UDP) bad uwei u dei u nongkyrshan ba radbah jong ka National Peoples’ Party (NPP) ha kane ka ilekshon ba dang shu dep na katei konstitwensi.
Kine lai ngut kiba la pynpaw ba ki kwah tiket na ka VPP ki long u Bah Anthony Nongsiej na Madanbitaw, Bah Teilang Lyngdoh uba dei bahaïing jong u Bah R.A Lyngdoh (MLA barim ka Sohïong constituency) na Sohïong bad u Bah Arister Kharpan na Krang.
Kine lai ngut ki la phah da ka jingthoh sha u Bah Ardent ha kine ki bnai ba la dep hadien ba u Bah Ardent u la hiar sha Sohïong ban pynrung dkhot ïa ki paidbah kiba wan sha ka jingïalang.
La sngewthuh ba kin dang don ki rangbah kiba la trei shit rhem ïa ka seng VPP kin sa ïa pan tiket haduh ban da dei ka sngi ban pynkut ban ailad ïa ki kyrtong.
Ki khubor kiba la ïoh lum ba na ka jingpynïeng kyrtong ka VPP ha Sohïong konstitwensi, la sngewthuh ba ki ar tylli ki seng saiñ pyrthei kiba kham ïoh bun ‘vote’ ha kane ka ilekshon MLA ba dang shu dep kata ka UDP bad NPP kan ktah namar ki la bun nongkyrshan kiba la mih na kitei ki seng ban leit kyrshan ïa ka VPP.
Nalor ka VPP kaba la thmu ban pynïeng kyrtong ha ka ilekshon MDC na Sohïong konstitwensi, kiba la pynkhreh ki long ka UDP, NPP bad Congress.
