Shillong, Nailar 11
Ka bording kaba tan na ka sngi lehse kan long kawei pat ka lad ban kyrshan ïa ka jingduna bording ha Jylla, lada ka projek ka treikam bha kumba la pynbna da u Myntri Rangbah ka Jylla.
Ban pyntyllun ïa kane ka projek bording, u Myntri Rangbah, u Conrad K Sangma u la pyllait paidbah ïa ka skhim kaba tip kum ka ‘Chief Minister’s Solar Mission’ ha State Convention Centre ha ka Sngi Thohdieng bad u la pynbna ba ka Sorkar kan thawlad ban kynshew pisa kumba T. 100 klur shisnem na ka bynta kane ka Mission.
U Myntri ka tnat bording, u AT Mondal bad u Chairman ka MNREDA, u Rupert Momin lem bad kiwei ki ophisar ki la donlang ha kane ka sngi.
U Conrad u la ïathuh ba ka Sorkar ka la kut jingmut ban pynmih bording na kiwei pat ki tyllong kiba khuid bad ki bym pyntngit ïa ka mariang bad ka jingtan bording na ka sngi ka dei kawei na kita.
Ka Sorkar Jylla kan ai subsidy kaba biang ha kaba ki Unit kiba heh kin ïoh haduh 70% bad kiba rit kin ïoh 50% ka subsidy. Na ka bynta ban pynsting ïa ka jinglut jingsep, ka Mission kan ïarap ruh ban plie lynti lyngba ki Bank, ban ïarap pynïoh 40% ka bailut baisep. Ki nongïoh myntoi ki donkam ban siew ïa ka ‘down payment’ kaba tang 10% ban ïoh pyntreikam ïa kane ka mission.
U Conrad u la pyntip ba ka Sorkar Jylla ka la mang ban kynshew haduh T.100 klur shisnem na ka bynta ka Solar Mission.
Na ka liang u Myntri ka tnat bording, u AT Mondal u la ïaroh ïa u Myntri Rangbah halor ki sienjam kiba u la shim ki ban sa ai jingmyntoi bha ïa ki paidbah ka Jylla.
U Mondal u la kubur ruh ba ka Jylla ka mad jingeh haba ïadei bad ka bording ilektrik namar ka Jylla ka dang shaniah tylli ha ki projek kiba shu den ïa ka um (hydro project) ban pynmih bording ilektrik.
La ïoh ruh ïa ka jingkren na u Chairman ka MNREDA, u Rupert Momin bad u Secretary ka tnat bording, u Joram Beda bad la ïashimbynta lang ruh da ki nongïoh myntoi kiba la shahjied ban ïohpdiang na u Myntri Rangbah.
