Nongstoiñ, Nailar 11
Saw ngut ki bar jylla kiba thmu ban wan trei ha ka tnad Post Office ban leit sam shithi sha ki shnong ki thaw ha ka thaiñ Mawshynrut ki la shah bat noh ha ki dkhot ka Khasi Students’ Union (KSU) Mawshynrut Circle ha ka Sngi Thohdieng.
Na ka liang ki nongkitkam ka KSU ki la ong ba hadien ba ka KSU ka la ïoh ban bat ïa kitei ki saw ngut, ka la phah leit phai noh ïa ki sha la ka jong ka jylla.
La ong ruh ba ka jingbat ïa kine ki bar-jylla ka long halor ka nongrim ba ka jingkyrduh kam ki trai ri trai muluk la ka dei ha ki kam shimet ne ha ka kam sorkar bad ka jinglong bym biang ki bar jylla naba kim nang ban kren ïa ka ktien Khasi.
Ki la ïathuh ruh ba ka KSU sengkmie halor katei ka bynta ka la dep ai da ka dorkhas sha u Myntri Rangbah ka jylla ban pan ïa ka bhah na ka bynta ki Khasi, hynrei ka jingsngap mynthi ka sorkar ïa ka jingthrang jong ki paidbah ban ai kam ai jam ïa ki trai ri trai muluk ka la pynlong ïa ka seng ban tuklar ha kaba ïadei bad kane ka mat.
Ka KSU ka la kyntu ruh ïa ki Sordar Shnong ba kin phikir bha hashwa ba kin ai ïa kino-kino ki kot ki sla sha ki bar jylla kaba ktah ïa ka jakpoh jong ki trai ri trai muluk.
“Ngi ai mynsiem ruh ïa ki samla Khasi ba kin mih shakhmat ban thep kam ha Post Office khang ba kin ïoh ïa la ka jong ka bhah,” la ong ka KSU.
