Nongstoiñ, Nailar:
Ka Federation of Khasi Jaiñtia & Garo People (FKJGP) Nongkhnum Circle ka la dawa na ka District Medical & Health Officer (DMHO), West Khasi Hills ban tuklar bad peit lem ïa ki jingduna jong ki artylli ki Sub-Centre namar ka jingduna bad ka jingbym biang na ka bynta ban ai ka jingshakri sha ki paidbah.
Ki nongïalam ka FKJGP halor kane ka bynta, ha ka 10 tarik mynta u bnai ki la leit ban buh da ka jingthoh ha ka DMHO, West Khasi Hills ha kaba la pynpaw ba ka Sub-Center ha Sangriang kumba ka long mynta kam don ka jingker kaba biang ha kaba ka lah ban wanrah ïa ki jingmynsaw.
Ha kaba ïadei bad ka Byrki Sub-Centre, ka don tang iwei i nos iba la shah pynkynriah kam mynta la katto-katne por. Kat haduh mynta ym pat lah thung bujli ha ka jaka jong i. Kumta na ka liang ka seng ka dawa ba dei ban thung bujli noh da iwei pat khnang ba ki kam kin ïaid beit ïaid ryntih.
Nalor nangta, ka FKJGP ha ka dorkhas ba la phah ka la dawa ruh ban thung sa arngut ki nos kumba long lem kiwei ki Sub-Center hapoh Sangriang Sub-Center namar kane ka Centre ka don tang kawei ka nos bad ka shem shitom bha ban trei marwei khamtam lada dei ha ki por ba wan ki nongpang ba armet ba hap ban pynkha khun.
Ki la ong ruh ba katkum ka jinglap jong ka FKJGP ba ki duna bha ki nongtrei cleaner ha kine ki Sub-Centre bad la donkam ban thung noh ïa ki cleaner khnang ba kitei ki Sub-center kin long kiba khuid namar kumba ka long mynta kam long kaba khuid bha.
La ong ruh ba kine ki Sub-Center kumba ki long mynta kim biang ka um, bad kane ka buh jingeh ha ka ban wanrah ïa ka khuid ka suba jong ki centre bad khamtam ruh kan buh jingeh ym tang ïa ki nongpang hynrei wat ïa ki nos bad ki nongtrei ha kine ki Center.
Ka FKJGP ka la dawa ruh ban maramot noh ïa ka madan ïing (Floor) jong ka Center ha Sangriang bad ruh ïa ki nala kiba la orpait kaba ym ilong shuh ban shu ieh kumto, kumjuh ruh khamtam ki jaka leit shabar kiba la shu dap tang da ka khyndew haduh haduh ba ym long ban pyndonkam haduh mynta.
Shuh shuh la dawa ruh ba dei ban phah doktor noh ha baroh artylli ki Sub-Center namar ki dei ki jaka ba donkam bha. Ha ka jingshisha ki doktor ki la dei ban wan shisien man la u bnai, hynrei la lap ba wat tang shisien shisnem ruh kim ju wan bad kane ka long kaei kaei kaba sngewsih bad sngewdiaw shisha.
“Kine ki Sub-center kim biang shisha ki surok bad la i donkam eh ban shna noh ïa ki surok. Ka jingbym don ki surok ka wanrah ka jingeh khamtam ki Sub-Center kumba ngi tip ba kiba armet bad kiba injek khyllung ki hap ban leit manla ka por, ka jingdon jong ki surok kan pynsuk ruh ha kaban pynkit ïa ki nongpang,” ong u Bah Shanbor Rynshiang President bad Bah Ioanis Iawlar General Secretary FKJGP Greater Nongkhnum Circle.
