Shillong, Nailar 11
Ka jingjyllei jong ki nongkhaïi bad ki nongdih drok hapoh ka jylla ka la long kaba shyrkhei haduh katta katta, hynrei kaba lyngngoh pat ka long ba kitei ki nongkhaïi bad ki nongdih drok ki shlan haduh katta katta ba kin ym don shuh kano-kano ka raiñ ka rem ne ka jingsheptieng wat ban dih ïa u drok ha ki jaka paidbah ruh.
Ïa kane la ïoh ban sakhi lyngba ka ‘video’ ba la ïoh ban ring ha Motphran hajan ka jaka bret ñiut ha ka por ba kitei ki nongdih bad ki nongpyndonkam ïa u drok ki dang leh ïa katei ka kam.
Na ka liang ki nongshong dukan kiba don hajan katei ka jaka bret ñiut ki la ïathuh ba kitei ki nongdih drok ki ju wan ha katei ka jaka ban dih drok man la ka sngi kiba kynthup naduh ki kynthei haduh ki shynrang hynrei kiba kham bun ki dei ki bar jylla suda.
Kitei ki nongdie jingdie ki la ïathuh ruh ba kitei ki nongdih drok kim salia bad kim tieng wat ïano-ïano bad haba kitei ki nongdie jingdie ki la mai la tim ïa ki ruh, ki la pyneh kylla bad ki la tim pynban da ki ktien sih ktien sang.
Haba kylli ïa kitei ki nongdie jingdie madan ba hato ki la dep ban ujor ïa kane sha ki bor pulit, na ka liang kitei ki nongdie jingdie madan kiba don ha katei ka jaka ki la ïathuh ba na ka por sha ka por ki la dep ban ujor ïa kane sha ki pulit. Na ka liang ki pulit ruh haba ki wan ha katei ka jaka ki la shu beh ïa kitei ki nongdih drok khlem da leh da kaba tyngeh ïa kitei ki nongdih drok kaba la pynlong ïa kitei ki nongdih drok ba kin wan leh ïa kajuh shu kajuh ka kam man la ka sngi bad wat haduh u pud ba kin da nud syndon ban ker da ki jingker jingda ha katei ka jaka ban pynlong kum ka ktem dih drok.
Ha kaba ïadei bad kane, na ka liang u President ka Hynñiewtrep National Youth Front (HNYF), u Bah Bless Dkhar u la ong ba ym tang ba katei ka jaka theh ñiut ka long kaba sma, hynrei ka la dei ruh ka ktem jong ki nongdih drok.
“Na ka liang jong ngi, ngi hap ban kren shai ba haei kata ka jingshngaiñ ka don bad ka Motphran hi ka dei ka jaka kaba baroh ki briew bad ki paidbah ki don hangne”, la ong u Bah Dkhar.
Nalor nangta, u Bah Dkhar u la kyntu ruh ïa ka sorkar ba kan ai jingïada kaba kyrpang hapoh ïew hapoh hat namar ki kam sniew kiba har rukom ki la jyllei hapoh ïew khamtam ha ka por mynmiet. Ym tang ka kam tuh ka kam thiem, hynrei ki don ki khep ba lada ym ïoh ban tuh ban thiem ka ju mih sa ka jingshim syndon wat ïa ka jingim briew ruh. Kane ka la pyntieng pynsmiej ruh ïa ki nongdie jingdie ba kin don ha katei ka jaka ha ka por mynmiet namar ka jingdon jong kitei nongdih drok.
“Nga na ka liang ka jong ngi, ngi kren sha ka sorkar ba kan ai ka jingïada kaba kyrpang khamtam eh hapoh Motphran namar ngi la ïoh ba ka kam tuh ka kam thiem bad ym dei tang ka kam tuh kam thiem hynrei ki ju mih shibun kiei-kiei ki kam pyntriem”, la ong u Bah Dkhar.
Shuh shuh u Bah Dkhar u la kyntu ruh ïa ka Shillong Municipal Board (SMB) ba ka dei ban shim ïa ka jingkitkhlieh ban weng ïa katei ka jaka bret ñiut na katei ka jaka namar ka jingsma ka la long shaba palat ha kaba wat ban ïeng tang shiphang ruh ym lah satia ban ïeng hangtei khamtam lei lei ka la ktah bha ïa ki nongshong die jingdie kiba im jakpoh ban bylla die jingdie ha katei ka jylla.
