Shillong, Nailar 11
Ka United Democratic Party (UDP) kan sa shong jingïalang General Council lashai ka Sngi Saitjaiñ (12 tarik Nailar) ha ka por 11:00 baje mynstep ha shlem treikam ka seng kaba don mar pyrshah bad ka Shillong College.
Katba ka General Council ka dang ïaid, ka Nomination Committee kaba la mihkhmat da u President bad Secretary na ki District, ki tnad jong ki samla bad ki kynthei kin long dkhot bad hynriew ngut ki nongkitkam ka seng UDP kiba ju trei shit rhem ïa ka seng kin long ki dkhot.
Kane ka Nomination Committee kan sa jied ïa u Chairman ba un pynïaid ïa ka Committee bad kan sa ïa pyrkhat ban jied pynthymmai ïa ki nongkitkam ka UDP Central Executive Committee na ka bynta ka samoi treikam kaba lai snem.
Katkum ka khubor ba la ïoh lum ka committee kan sa tyrwa biang ïa ka kyrteng u Bah Metbah Lyngdoh kum u President namar kat haduh mynta ym shym la don ban pynpaw ba ki kwah ïa katei ka shuki.
Hadien ba ka committee ka la dep jied kan sa wan ban tyrwa ha ka General Council bad ynda ki la pdiang kin sa ïoh ban pynskhem ha kane kajuh ka sngi.
Haba ïakren bad u Bah Alantry Dkhar uba dei u Vice-President ka UDP, u la pynthikna ba ka General Council jong ka UDP kan ïaid beit lashai ka sngi ka ban sdang ha ka por 11 baje mynstep.
U la ïathuh ba ha kane ka General Council ki ban wan mihkhmat ki dei kiba la jied da ki District.
Sa kawei ka khubor kaba la ïoh lum la ïathuh ba ka jingbym pyntip shuh ka UDP ïa u Bah Bindo Lanong sha kane ka General Council ka dei namar ba u la leh kiar hi na ka seng naduh ba u leit ïakhun ïa ka ilekshon MLA na Nongkrem constituency.
Ha kine ki sngi u Bah Bindo u la pynpaw ba un nym leit sha ka General Council ka UDP namar ym don ba pyntip wat la u dei u nongaibuit jong ka UDP.
Kum ban shu pynkynmaw ka jingbteng biang u Bah Metbah Lyngdoh ïa ka kam President naduh mynshem snem ka dei namar ki nongkitkam ka UDP kim kwah ban pynthymmai nongkitkam naba ka ilekshon MLA ha kato ka por ka la jan. Hynrei mynta kin pynthymmai noh kum shi bynta ban pynkhreh ïa ka ilekshon MDC bad MP Lok Sabha ban long lashem snem.
