Shillong, Nailar 11
Ka Kynhun Myntri jong ka Sorkar Jylla ka la rai ban phah pule biang ïa ki ophisar kiba peit ïa ki tnat bapher bapher kynthup ïa ki ophisar pulit ha kaba yn bei ïa ka bai pule jong ki T.15 lak marwei. Tangba kino-kino ki ophisar kiba leit pule ban kham shemphang bad pyntbit ïa ka rukom treikam, kim dei satia ban shim shuti.
Ïa kane ka rai la mynjur da ka Kynhun Myntri ha ka jingïalang kaba la long ha Secretariat ha ka sngi Thohdieng (11 tarik Nailar).
Haba ïathuh sha ki lad pathai khubor ïa ki rai bapher bapher kiba la mynjur da ka Kynhun Myntri, u Myntri Sorkar uba long ruh u nongaiktien ka Sorkar MDA-II, u Bah Paul Lyngdoh u la ong ba ka jingthmu jong kane jingphah pule ïa ki ophisar naduh ki IAS, IPS, IFS, MCS, MPS, MFS bad kiwei kiwei ki ophisar ka long ba kin kham ïoh shuh ka jingnang jingtip ha ka rukom treikam jong ki ha kaba kin lah pule lyngba ki ‘online course’ bapher bapher kynthup ban leit pule ha IIM Shillong.
Ïa kane ka jingpule pyntbit na ka bynta ki heh ophisar ka Sorkar la tip kum ka “Mid-Career Sponsored Courses (MCSC)”. Ka por ban pyndep ïa kane jingpule kan long katkum ba la buh da kito ki jaka pule.
Nalor nangta, u Bah Paul u la ong ba ki ophisar kiba leit ban pule kim lah satia ban shim shuti lane ieh ïa ka kam kaba ki trei, hynrei ki hap trei bad pule ruh ha kajuh ka por khlem da pyndkoh ïa ka jingtreikam.
U la ong ba ki ophisar kin ïoh ka lad ban pule pyntbit ha ki skulbah (University), IIM bad kiwei kiwei ki jaka pule kiba ai ïa ki degree bad diploma kiba kham heh kyrdan.
Ki bynta jong ka jingpule pyntbit ki kynthup ïa ka MBA, PhD Programme, nalor ka Executive fellow in Management lane PhD kiba la tyrwa da ka IIM Shillong.
U la ong ka Master ha ka Liang ka Public Policies ka dei ka online course ba la tyrwa da ka OP Jindal Global University, ka Professional Certificate Programme, Data Science bad Artificial Intelligence kaba dei hi ka online course ba la tyrwa da ka Indian Institute of Information Technology, Bangalore lane University of Merriland, nalor ka part time PhD ba la tyrwa da ka Jindal Global Law School.
Kum ka jingkyrshan ïa kine ki ophisar ban pule na ka bynta ka jingmyntoi ïa ki bad ïa ka Jylla khamtam ban tip bad shemphang shuh ha rukom treikam, ka Sorkar Jylla kan bei ïa ka bai pule (tuition fees) haduh T. 15 lak marwei.
U la ong ba ka kyndon ka long ba kito kiba ïoh ban pule ki dei ban dang don sa 7 snem ha ka kam ban shakri ïa ka Jylla, ym lah ban shim ïa ka shuti leit pule (study leave) bad haduh 3 ngut ki ophisar kin ïoh ban pule man u snem.
Haba kylli, la kane ka bai pule ka dei kaba la heh palat haduh T.15 lak marwei, u Bah Paul u la ong ba kane ka dei ka dor kaba la shu buh antad lypa, bad kam mut ba kan poi haduh katne namar kin don ki jingpule kiba ka jingsiew ka kham duna, bad ki don ki jingpule kiba kham heh ka jingsiew.
Ka Sorkar ka la mynjur ruh ïa ka Committee kaba khlieh da u Chief Secretary ban khmih bniah bad mynjur ïa ki kot ki sla jong kito ki ophisar kiba dei ban leit pule.
Haba kylli shaphang ka jingktah ka rukom treikam jong ki ophisar namar ki hap ruh ban leit pule, U Bah Paul u la ong ba kane kan long ka jingmyntoi ïa ki ophisar namar la bun snem ki khlem pule shuh bad lyngba kane ka lad, kin ïoh jingnang jingtip shuh shuh bad kin nang lah ban trei bad shakri kham bha.
Ka jingkylli ka long ruh ïa ki Myntri bad ki MLA. Lada ki ophisar ki hap ban pule pyntbit biang, hato ki Myntri Sorkar bad ki MLA pat kim donkam mo khamtam haba kum ki nongsynshar kim biang ka jingnang jingtip khamtam lada ym biang ka kyrdan pule?
