Nongstoiñ, Nailar:
Ka shlem treikam jong ka District Medical bad Health Officer (DMHO), Nongstoiñ, West Khasi Hills District, ka la pynlong ïa ka prokram na ka bynta ban pyntreikam ïa ka prokram ai tika hapoh jong ka distrik kaba la tip kum ka ‘Intensified Mission Indradhanush 5.0’ ha kaba ka Kong SM Bang, DPO, ICDS, Nongstoiñ ka la long kum ka kongsan.
Ka Kong SM Bang haba kren kum ka kongsan ka la ong ba na ka por sha ka por ka tnat Social Welfare ha ryngkat bad ka tnat ka Koit ka Khiah, bad ka ophis BDO, ki ju ïatreilang ban pyntyllun ïa ki kam kiba la bynshet ha ki, la ka dei na ka Sorkar Pdeng ne Sorkar Jylla, bad ha kane ka kynti ruh.
Nalor nangta, ka la la kular ban ïatreilang met bad mynsiem bad ka tnat ka Koit ka Khiah lyngba ki nongtrei Anganwadi ki ASHA bad kiwei kiwei, khnang ba kane ka mission ai tika kan long kaba jop bad ban pynïoh tika sha baroh ki bym pat pyndep lut ïa ki dose tika jong ki.
Haba kren halor ka ‘Mission Indradhanush 5.0’, u Dr. R. Laloo, u la ong ba ka thong jong kane ka mission ka long ban pynïoh tika bad ka dose kaba pura sha baroh ki khyllung kiba hapdeng 0 – 23 bnai kumjuh sha kito ki bym pat pyndep pura ïa ki dose tika.
Kumjuh ruh u la ong ba na ka bynta ki khynnah kiba hapdeng 2-5 haduh san snem ki bym pat pyndep ïa ka dose kaba nyngkong bad kaba ar jong ka jingpang Measles, nangta ka tika na ka bynta ka Pentavalent bad ka jingpyndih dawai Polio, ka tika sha ki longkmie kiba ar met la ka dei ïa kito kiba la ïoh tika hynrei ki bym pyndep pura ïa ka dose.
La phiah ïa kane ka prokram ai tika ha ki lai bynta, ka wat kaba nyngkong kan sdang naduh ka 7-12 tarik u Nailar, 2023, ka wat kaba ar kan sdang ha ka 11-16 tarik u Nailur, 2023 bad ka wat kaba lai kan sdang naduh ka 9-14 tarik u Risaw 2023.
U Dr. R. Laloo, u la ong ruh ba watla, ki la don ki block bad ki jaka sumar hapoh West Khasi Hills, District, kiba la kynjoh 95% ka jingai tika, hynrei ki dang don bun kiwei pat ki block bad ki jaka sumar ki bym pat kynjoh ïa kane ka thong, bad ka West Khasi Hills, District, ka dei ka district kaba bun tam napdeng ki nongai tika ki bym pyndep pura ïa ka dose tika jong ka jingpang Measles Rubella. Haba kheiñ ïa ka percentage jong kiba ai tika na ka bynta kane ka jingpang, ka long 95% ki la dep ai ïa ka dose kaba nyngkong katba ïa ka dose kaba ar ka long tang 69%, bad ka hiar haduh 26%.
Shuh shuh u la ong ruh ba ka Sorkar India, ka don ïa ka thong ban rat dyngkhong ïa ka jingpang Measles Rubella napoh Ri India ha u bnai Nohprah, 2023, bad ban poi sha kane ka thong ka donkam ïa ka jingïatreilang jong baroh.
U la kyntu jur ïa baroh ki kmie ki kpa ba kin wan shakhmat ban ai tika ïa ki khun jong ki, khnang ban pynlong ïa ka West Khasi Hills District, ka District, kaba lait na ka jingpang Measles Rubella.
Ha katei ka prokram la donlang ruh u Bah S Nongsiej uba la wan mihkhmat na ka shlem treikam BDO, Nongstoiñ kum u Symbud Kongsan ha ka jingdon lang u Dr. R. Laloo, District Medical and Child Health Officer, West Khasi Hills, District, kiwei pat ki doktor bad ki nongtrei jong ka DMHO, bad nalor kiwei ki tnat Sorkar.
