Shillong, Nailar 11
Ka tnat pohïing jong ka sorkar jylla ha ka Sngi Thohdieng ka la pynkynriah kam ïa u SP ka West Garo Hills, u Vivekanand Singh Rathore, IPS, shi bnai duna hadien ka jingïakynad ha Tura ha kaba ka shlem treikam u Myntri Rangbah ka la shah kawang maw nalor ka jingshah thang ki kali sorkar.
Ha ka hukum ba la pynmih mynta ka sngi, u Rathore u la shah pynkynriah ban shimti kum u Commandant ka 3rd MLP Battalion ha West Jaiñtia Hills. Lah ban kdew ba hadien katei ka jingjia ha Tura ha ka miet 24 tarik Naitung, ki la don ki jingdawa ban pynkynriah ïa u Rathore.
Ha ka jaka jong u Rathore, ka sorkar ka la thung ïa u SP ba mynta ka South Garo Hills, u Abraham T Sangma, MPS.
Nalor nangta ka sorkar ka la pynkynriah ïa u SP ka North Garo Hills, u Shailendra Bamaniya, IPS ban shimti kum u SP ka South Garo Hills. Ha ka jaka jong u Bamaniya, ka sorkar ka la thung ïa u Commandant ba mynta ka 2nd MLP Battalion, u Bruno A Sangma, MPS.
Nalorkata, ka sorkar ka la pynkynriah ïa u SP ka tnat Traffic, East Khasi Hills, u Dr Dara Aswaghosh, IPS ban shimti kum u Commandant ka 2nd MLP Battalion.
U Commandant ba mynta ka 3rd MLP Battalion, u Kamakhya Prasad, MPS, u la shah pynkynriah ban shimti kum u SP ka tnat Traffic, East Khasi Hills.
