Khliehriat, Nailar:
U Deputy Commissioner ka East Jaiñtia Hills District, Khliehriat ha ka sngi Balang ba la dep u la pyntip paidbah ha kaba ïadei bad ki jingbthah ba la pynmih da ka ïingbishar ba ha khlieh duh (Supreme Court) khnang ban khang lad ha kaba ïadei bad ka jinghap jingliat jong ki khynnah khunlung hapoh ki thliew ksam um ne jaka pynlang um hapoh ki shnong ki thaw ki jong ki.
Katkum kine ki jingbthah, ki trai jong ka jaka ha shwa ba kin shim ïa ki sienjam ban shna ïa ki jaka ksam um ne pynlang um, ki trai jaka ki dei ban ai jingtip da ka jingthoh la kumno-kumno 15 sngi sha ki bor sorkar jong ka thaiñ, kata sha u District Magistrate lane ki heh ba dei khmih jong ka tnat Ground Water/ Public Health, ka Municipal Corporation.
Dei ban pyntip ïa ka registration jong baroh ki drilling agency kata la ki dei jong ka sorkar ne semi lane shimet bad ki bor district ne ki bor ba dei khmih katba ka shong. Dei ban wah ïa ki jingthoh ha ka por ba pyntrei hajan ka thliew ne pung ha ryngkat ki jingthoh kiba bniah ha kaba ïadei bad ka kyrteng bad jaka jong ka drilling agency ha ka por ba dang pyntrei ne pynbha ïa ka pung bad ruh ïa ka kyrteng bad jaka sah ba pura jong u trai pung.
La bthah ruh ba dei ban ker sainar sawdong jong ka pung ne thliew bad ruh ban tap bha da ka dewbilat sawdong jong ka pung. Lada jia ba donkam ban shna ne maramot ïa ka pump ym dei ban shu ieh ïa ka thliew khlem da tap. Ïa ki thliew kiba ym pyndonkam shuh dei ban tap noh da ka khyndew ne shyiap ne da ki maw.
Halor kane ka bynta la aibor ïa ki district magistrate ne kiwei pat ki bor ba dei khmih ba kin pynthikna halor ka jingbud ryntih ïa ki jingbthah. Ha ki thaiñ nongkyndong ki nongkhmih ïa kane ka bynta kin long lyngba ki nongïalam shnong bad ki heh na ka tnat Agriculture, katba ha ki jaka sor kin long lyngba ki Junior Engineer bad ki heh sorkar na ka tnat Ground Water/ Public Health/Municipal Corporation bad kiwei pat.
