Mawkyrwat, Nailar 11
Ki runar ki bym lah ban tip, dang ha kine ki khyndiat sngi ki la kyndang ïa ka kamra jong ka Principal Mawthawpdah Higher Secondary School bad ki la ïoh ruh ban rong ïa ka pisa kaba haduh T. 3 lak.
Katkum ka ejahar ba la ujor da ka Kong Wantimon Mawa, Principal jong katei ka skul, la ïathuh ba ïa ka sngi jong ka jingshah tuh ym shym lah ban tip namar ba ka Kong Wantimon ka la shim shuti kumba katto-katne sngi.
Ka la ong ba dei ha ka 10 tarik Nailar, 2023 ha ka por kumba 11:30 eiei mynstep hadien ba ka la poi ha kamra lajong ka la kyndit ban lap ba ka kamra jong ka, ka la shah lied ha ki runar bad ki runar ki la pynpait ruh ïa ka tala jong ka almari.
Ki tyllong khubor ki la ïathuh ruh ba kine ki runar ki la pynpra bad khura ruh ïa ki kot ki sla ha katei kamra bad ki la ïoh ban tuh ruh haduh T. 3 lak.
Ha kaba ïadei bad katei ka jingjia na ka liang ki pulit ki la pynrung ïa ka ejahar bad la aiti ha u Sub-Inspector I. Thabah ba un tohkit ban lap ïa ki runar kiba donkti ha katei kam.
