Shillong, Nailar 11
U Myntri ka tnat bording u, AT Mondal u la ong ba ka Sorkar Jylla kam pat khylliap ïa ka lynnong ban ïakren shaphang ka jingpynmih bording na u dewïong lane Thermal Project wat lada ka Kynhun Myntri ka la rai ban pyndam noh ïa ka soskular bad ka North Eastern Electric Power Corporation Ltd (NEEPCO) ban tei ïa ka thermal project kaba 500 megawatts.
Ka NEEPCO ka la soi ïa ka soskular bad ka Sorkar Jylla palat 10 snem mynshwa ban tei ïa ka thermal project ha Rilum Garo kaba lah ban pynmih bording kumba 500 megawatts.
Hynrei ka NEEPCO ka la rai ban randien noh namar ka kwah ban phaikhmat sha ki projek kiba kham khuid bad pynjyrngam ïa ka mariang.
Ïa ka rai ban pyndam ïa ka soskular bad ka NEEPCO la mynjur da ka Kynhun Myntri ha ka jingïalang kaba la long ha Secretariat ha ka Sngi Thohdieng.
Haba kylli la ka Sorkar Jylla kam don jingkyrmen ban tei ïa ka Thermal Project ha Jylla, u Mondal u la ong ba kam dei kumta, namarba ka Jylla ka dang thaw lad ïa kum kane ka projek.
Haba kylli la ka Sorkar kan pyndam noh ïa ka soskular bad ka Dharampal Satyapal Group ban tei ïa ka thermal project kaba 240 megawatts ha South Garo Hills, u Mondal u la ong ba ka Sorkar ka la ap slem ïa ka kompani ban wan shakhmat ban pyntrei hynrei haduh mynta kane ka projek ka dang sahteng.
Ha ka jingshisha, u Mondal u la kubur ba ka Jylla kam biang ka jingïoh dewïong ban pyndonkam na ka bynta kane ka projek bad lada bei pisa ruh lehse kan shu lehnohei bad khlem seisoh.
