Shillong, Nailar:
Ka North Eastern Hill University (NEHU) kan sa pynlong ïa ka jingpynrung kam lane ka Rozgar Mela ka ban sa long ha Multiuse Convention Hall ka ban sdang naduh ka 16-18 tarik mynta u bnai. U Myntri Rangbah ka jylla, u Conrad K Sangma un plie paidbah ïa katei ka Rozgar Mela bad un long ruh kum u kongsan ha katei ka sngi.
Haba kren sha ki lad pathai khubor ha ka Sngi Palei, u Vice Chancellor jong ka North Eastern Hill University (NEHU), u Professor Prabha Shankar Shukla u la ong ba katkum ka jingthew kaba mynta ka jingdon jong ki briew hapoh ka jylla Meghalaya ka la kot sha kumba 38.16 lak bad katkum ka kaiphod kaba la pyllait ha ka 19 tarik u bnai Naitung 2023 da ka Niti Aayog, ka jylla Meghalaya ka dei ka jylla kaba duk tam hadien ka Bihar.
U la ong ba haduh kumba 80% ki nongshong shnong ka jylla ki dei kiba dang im lyngba ka ka rep ha ka riang bad ka kam ri jingri kaba la noh synñiang tang kumba 17% sha ka ïoh ka kot ka jylla. Nangta, u la ong ba ka jylla ka la ïakynduh jingeh shikatdei eh ha ka jingïoh kam ïoh jam ha kaba ki khynnah samla kim ïoh satia ïa ka kam ka jam bad kane ka la wanrah ka jingeh kaba khraw ïa ka jylla.
Nalor kata, u Vice Chancellor u la ïathuh ba ki artylli ki kompani kiba pawnam kiba la tip kum ka SODEXO bad ka ADECCO kin sa wan ban ïashim bynta ha katei ka sngi.
U VC u la ïathuh ba shibynta na ki kam kiba yn sa pynrung kin long kiba la mang kyrpang na ka bynta kiba la dep ban pule ïa ka kyrdan pule ha ka klas 10, klas 12, ka ITI, Diploma bad ha ka Graduation ha kino-kino ki kyrdan pule.
U la ong ba ka jingkyrduh kam kyrduh jam ka long kawei na ki daw jong ka jingduk bad ki khynnah samla ki bym biang kam biang jam kim dei tang ban shu shaniah ha ki kam sorkar hynrei ki dei ban pyrkhat jngai bad ki dei ban shim ïa kabu ban pyrshang ha ka liang ka seng kam lade khnang ban ïohnong kham bun ka ban long shyrta. Ki donkam ruh ban wad bniah shaphang kiwei kiwei ki kam ki jam kiba don ha kylleng satlak ka pyrthei bad ka NEHU lyngba kane ka recruitment drive/Rozgar Mela kan ïaleh ban pyndap ïa ka jingthylli.
“Ha ryngkat bad kitei ki artylli ki kompani, ngin sa don sa katto katne tylli ki kompani ha katei ka jingpynrung kam. Kine ki jaka bathylli ki dei kiba donkam kyrkieh bad ki nongthep kin hap ban sdang noh ïa ka kam jong ki”, la ong u Vice Chancellor.
U la ïathuh ruh ba shibynta na ka lai bynta ka jingpynrung kam ka dei kaba la mang kyrpang ïa ki kynthei kaba long 2000 tam.
Shuh shuh u Vice Chancellor u la ong ba ki kam kiba ka kompani SODEXO ki tyrwa ki long Assistant Cook (150 tylli), Associate Housekeeping (400 tylli), Cook (100 tylli), Front Office Executive (50 tylli) nalor kiwei kiwei.
Katba ka kompani ADECCO ka tyrwa ïa ki kam kum ka Transaction Process Representatives (150 tylli), Technical Operator (2000 tam), Van delivery Executive (200 tam) nalor kiwei kiwei.
