Shillong, Nailar 13
Hadien ka jingdon kiba injek drok ha Motphran bad ka jingieh rynhang jong ki bor ba dei khmih ïa katei ka jaka bret ñiut kaba la wanrah ka jingsma iwtung kaba shyrkhei bad pynlong ruh ïa ki nongdie jingdie bad kiba ïaid ba ïeng lyngba katei ka jaka ban ud ban nam, na ka liang U Nongsaiñ Hima ha ka sngi Saitjaiñ u la leit ban ïakynduh ïa u Rangbah Shnong ka Mawkhar, u Bah Arwan Singh Tariang ha kaba utei u Rangbah Shnong u la pynpaw ka jingsngew kyndit kaba khraw ban ïohi ïa katei ka ‘video’.
Ha ka sngi Thohdieng, U Nongsaiñ Hima u la ïoh ban ring dur ïa arngut ki briew kiba dang ïa shong hadien ka jaka bret ñiut ha Motphran bad kiba dang injek drok artad. Kane ka dei tang ka nuksa kaba pyni shai ïa ka jingsaphriang jong u drok bad ka jingbun ki nongpyndonkam ïa une u jingdih uba shyrkhei.
U Bah Tariang u la ong ba na ka liang ka Dorbar Shnong kan sa shong pyrkhat ïa ki lad ki lynti kumno ban ïaleh bad weng bad ruh ban pynkhuid noh ïa katei ka jaka.
Nalor kata, u Bah Tariang u la ong ba katei ka jaka kam dei tangba ka long kaba sma iwtung kumba ka Dorbar Shnong Mawkhar ka la dep ban ujor ha ki por kiba mynshwa sha ka Shillong Muncipal Board (SMB) ba ka dei ban weng noh ïa katei ka jaka bret ñiut na katei ka jaka hynrei ka jingleit ong jong ka Dorbar Shnong ka khlem shym poi shano-shano ruh bad ka la sahkut hajuh beit.
“Na ka liang ka Dorbar Shnong, mynta ngi la hap ïa shong ban ïa pyrkhat tyngeh ïa ki lad ki lynti kumno ba ngin ïaleh ban weng bad pynkhuid noh ïa katei ka jaka”, la ong u Bah Tariang.
Nangta shuh shuh u Bah Tariang u la ong ba ka dawbah hi kaba la pynlong ïa kitei ki nongdih drok ba kin nud ban dih drok ha katei ka jaka ka dei ba ka don katei ka jaka theh ñiut.
Namar kata, u Bah Tariang u la ong ba lada ka Shillong Municipal Board ka shu sngap jar bad kam leh eiei ban weng ïa katei ka jaka bret ñiut, na ka liang ka Dorbar Shnong ka hap ban shim ban ïakren bad ki bor kiba kham shajrong haduh ban da lah ban weng shisyndon ïa katei ka jaka bret ñiut na katei ka jaka namar ba katei ka jaka ym tang ba ka long kaba sma iwtung, hynrei ka la kylla long ka jaka rieh tngen ïa kiba dih drok bad ka jaka ban ïa khaïi drok
“Ngin hap ban ïakren bad ki bor kiba shajrong namar ngi la lap tyngkreiñ bad ngi la don kat kato ka sakhi mynta ba ym dei tangba ka sma iwtung, hynrei ka la long kum ka jaka rieh tngen ïa kine ki nongkyrni dih drok bad ïa ki nongkhaïi ruh ha kajuh ka por kaba mut ka la long ka ktem bah”, la ong u Bah Tariang.
Kumta na ka liang u Bah Tariang u la ong ka Dorbar Shnong kan sa leh da kaba tyngeh namar katei ka jaka ka dei ka jaka ïaid jaka ïeng jong ki paidbah bad khamtam ha ka por mynmiet mynïong lei, kam don jingshngaiñ shuh ïa ki paidbah.
