Shillong, Nailar 13
U President ka Hynñiewtrep National Youth Front (HNYF) uba long ruh u ksiang ka Hynñiewtrep National Liberation Council (HNLC), Bah Sadon K. Blah u la ong ba ka jingkhlad noh u General Secretary barim ka HNLC, Bah Cherishstarfield Thangkhiew (Bam Kwai ha Dwar U Blei) ka la buh jingeh khyndiat ïa ka mat halor ka jingïakren ïasuk.
“Ka dei ka jingshisha ba u Bah Cherish ha shuwa ba ngan shimti kum u ksiang, nga la ïakren la bunsien bad u halor ka mat jong ka jingïakren ïasuk,” la ong u Bah Blah haba kren sha ki lad pathai khubor ha ka Sngi U Blei.
U la ong ruh ba ka jingkhlad noh ba khlem dei por jong u Bah Cherish ka la pynkyllaiñ, pynslem bad buh jingeh khyndiat ïa ka jingïakren ïasuk namarba kum u nongïalam bad nongmait phang ba nakhmat jong ka kane kam (jingïakren ïasuk) u la shah dkhat jubor noh la ka jingim.
“Jyn lada don u Bah Cherish, nga tharai kane ka kam kan jyn da la seisoh,” la ong utei u nongïalam.
Haba kylli, u la ong, “Ka jingbym lah jong ka Sorkar ban pdiang ïa ka CBI…te ki bahaïing ki la leh ïa kaba dei eh ban leit sha ka Ïingbishar ka Jylla namarba ka ïingbishar ka don la u jong u pud u sam, ka don la ka jong ka bor ban pynbor ïa ka Sorkar ban sei ïa ka jingshisha bad ban leh ïa kaba donkam halor kane ka jingpynïap klep (Fake Encounter) ïa u Bah Cherish.”
Ha kajuh ka por, haba jubab halor ka jingpynsngew jong ki bahaïing u Bah Cherish sha ki dkhot ka seng (HNLC) ban long kiba husiar, u Bah Blah u la kubur ba katkum ka jingsngew jong kiba bun balang – ka don kaba kum kata khamtam hadien ka jingïap jong u Bah Cherish ha kti ki pulit.
“Ka don ka jingsngew ba dei ban long kiba husiar hynrei kum ngi kiba peit ïa kane ka jingïakren ïasuk, kumba ka long mynta, ngam i ba kan don kano-kano kaba yn hap ban husiar namar ka jingïakren ka lam sha ka jingmanbha bad ka ïaid beit shakhmat,” u la ong.
Halor ka jingkynnoh donkti ïa ki SHNLC ban shim ïa ka jingim u Bah Cherish, u President ka HNYF u la bynrap, “Na ka liang ki SHNLC ki la ai ka jingpynshai mar-mar ba kim don kano-kano ka jingdonkti, hynrei na ka liang ka HNLC ka ïohsngew ïa kata ka jingdonkti jong ki bad ki dang ïaid ban wad ki sakhi satar haduh katno ki donkti bad ka seng ka dang ïaid shakhmat bad kane.”
Lah ban pynkynmaw ba u Bah Cherishstarfield Thangkhiew u la khlad noh ha ka step jong ka 13 tarik Nailar, 2021 hadien ba ka la don ka jingkhynra ki pulit ha ïingsah jong u ha kaba ki pulit ki la kynnoh ba ka jingsiat ïa u ka dei namarba u la rah da ka tari ban pynmynsaw haba ki leit ban kem ïa u halor ka jingkynnoh ba u don bynta ha ki jingjia pynbthei bom ha East Jaiñtia Hills District bad Laitumkhrah.
