Shillong, Nailar 13
Ki nongkitkam na ki jylli bapher bapher kiba wan ban ïashim bynta ha ka General Council ba la pynlong da ka United Democratic Party (UDP) ha ka 12 tarik mynta u bnai ha shlem treikam ka seng ha Shillong ki la pynsngew ha ki nongkitkam ba ki dei ban shim ïa ki mat kaba ka jaidbynriew ka shah ktah khnang ban wanrah ka jingïajan bad ki paidbah.
Kane ka jingpynsngew ki nongkitkam na ki jylli bapher bapher ka dei hadien ba la dep mynjur ïa ka kyrteng jong ki nongkitkam kiba thymmai ka UDP naduh u President ka seng u Bah Metbah Lyngdoh hadien ba ka Nomination Committee ka la wan ban tyrwa ïa ka kyrteng hakhmat jong ki.
Haba u President ka UDP u Bah Metbah Lyngdoh u la ailad ïa ki dkhot ka General Council ba kin pynsngew, ki dkhot ki la pynpaw ba ki nongïalam ka UDP ki leh klet ïa kito ki nongkitkam ki bym don ki MLA.
Nalor kata, ki la pynpaw ruh ba ki MLA kiba don mynta ki dei ban shim ïa ki mat kaba ktah ïa ka jaidbynriew khnang ban ïoh jingshaniah na ki paidbah.
Ki la ai nuksa ba kum ka Voice of the People Party (VPP) kaba dang shu mih thymmai, hynrei kane ka seng ka la kham kiew bha namar ki nongïalam ki shim ïa ki mat kaba ka jaidbynriew ka donkam.
Nangta shuh shuh ki don ruh kiba pynpaw ba ki nongïalam ba ha khmat ki dei ban pynbor ïa ka sorkar ba kan pynbna noh ïa ki kyrteng jong ki dkhot ka Expert Committee ba kan bishar bniah ïa ka bhah thung kam thung jam.
Nalor u Bah Metbah Lyngdoh kum u President, la jied biang ïa u Bah Jemino Mawthoh kum u General Secretary.
Kiwei pat ki nongkitkam ba ka Nomination committee ka la jied ki long:- President Farmer Wing Bah- Olan Suin, MLA, Secretary – Bah Synsharkupar Lyngdoh Thabah, MLA, Joint Secretary – Remington Pyngrope, Women’s Wing President- Kong Pretty Pyngrope, Secretary Women Wing- Kong Wandashisha Rynjah, President Youth Wing- Bah Kyrmen Shylla, MLA, Secretary Youth Wing- Bah Balajied Synrem, MLA, Treasure – Beyonstar Kurbah, Joint Finance Secretary- Bah Markynsai Khongwir, Finance Secretary – Michael War, Joint Secretary – Bah Ryngkat Lyndem, Sunshine Makri, Anbil Lyngdoh, Tirot Suchiang, Secretary- Teinwell Dkhar, Monarch Shabong, Dr. Aman War, GG Bung, Winning Sungoh, Jambor War, Lasky Rymbai, Mitchell Wankhar, Vice-President- Bah Shitlang Pale, Process Sawkmie, Alantry Dkhar, Mayralbol Syiem, Working President- Paul Lyngdoh, Titos Chyne, Nujorki Sungoh, Lahkmen Rymbui, Donbok khymdeit, Rikmai Sangma, LC Momin, Renikton Tongkhar.
