Jowai, Nailar 13
Da ka jingthmu ban ïarap ïa ki Pnar ban sngewthuh shai ïa ka Ktien U Blei haba ki ïohsngew ïa ka ha ka ktien lajong, ka Pnar Linguist (kompeni) ka la lah ban pynkylla ïa ka Baibl sha ka Ktien Pnar.
Ïa kane ka Baibl lah ban ïoh tang da kaba sngap da ka sur kren ne kaba ki ong ka ‘Audio Bible’ bad lah ban ïoh tang lyngba ki ‘Mobile Phone’ da kaba ‘download’ na ‘Google Playstore’.
Ha kajuh ka por, lah ruh ban ‘download’ ïa ka na ka https://play.google.com/store/apps/details?id=com.pabt.kabaibylpnar.pnar lane lah ban wad ïa ka ha ka ‘Playstore’ da kaba thoh – Ka Baibyl Pnar.
Ïa kane ka Baibl la pynkylla na ka ‘Bible Greek’ bad ‘Bible Hebrew’ ha ryngkat ka jingïarap ki Baibl Phareng.
Ka jingthmu jong kane ka Baibl ka long ban ïarap ïa ki briew kiba kren Pnar, ban sngewthuh shai ïa ka Ktien U Blai haba ki sngap ïa ka ha ka ktien lajong.
Sa kawei ka daw ba ka Pnar Linguist ka shim ïa kane ka sienjam ban pynkylla ïa ka Baibl sha ka ktien Pnar ka long ban ïarap ha ka ban pynneh-pynsah ïa ka ktien Pnar.
Ki nongpynkylla ïa kane ka Baibl ki dei kiba na ki dkhot Balang bapher-bapher kiba don ha Ri Jaiñtia, naduh kiba na ka Balang Presbyterian, Balang U Blei, Balang U Khrist, Balang CNI bad Balang Katholik.
Ïa mynta ki kot kiba don ha kane ka Baibl ki dang don tang 9 tylli katba dang dep ban leh ‘Recording’ khatduh ïa kiwei pat ki kot bad yn dang thep shuh ha ka ‘App’ bad ban ïoh ïa ki kot bathymmai donkam ban ‘update’ ïa ka ‘App’.
Na ka bynta ki shnong ki thaw bad ki paralok kiba kham tlot ka ‘internet’ ki lah ban ‘download’ na https://app.scriptoria.io/api/products/2215235b-a446-4d20-86b2-bc589d297dcc/files/published/apk).
Na ka liang ki nongshna ïa kane ka Baibl ki kyrpad ïa kiba sngap ïa kane ka Baibl, lada ki shem ïa ki jingbakla, lane kiba shitom ban sngewthuh lane ki bym da shai bha, ki lah ban thoh ha ka ‘Review Section’ jong ka ‘Playstore’ lane sha ka email – [email protected].
