Nongpoh, Nailar 13
Na ka jingleit kai sngewbha, kawei ka samla lud kaba dang 21 snem ka rta ka la duh noh ïa la ka jingim hadien ba ka la kum syntuid bad ngam jyllop ha ka Wah Umtru kaba don marjan bad ka Panitola Power House jong ka thaiñ Byrnihat ha Ri Bhoi District ha ka Sngi U Blei.
Kumba la ïoh jingtip na ki bor pulit ka Ri Bhoi, la ïathuh ba katei ka samla kaba la tip kyrteng kum ka Pooja Sarkar na Guwahati ka la wan kai sngewbha ryngkat bad la ki paralok sha katei ka jaka ha ka por mynstep. Hynrei ha ka por ba ka dang thmu ban sum harud jong katei ka Wah Umtru, ka la kum syntuid bad hap bad ka shah kit noh ha ka um kat haduh ba kan duh syndon ïa la ka jingim.
La ïathuh ba ki paralok jong ka, kiba la sakhi ïa katei ka jingjia ki la pyrshang ban ïarap, hynrei kim ïohi shuh ïa ka naba ka la ngam bad shah rong ha ka um.
Na ka liang kitei ki paralok hadien ba kim sngewdonlad shuh, ki la pyntip noh sha ki bor jong ka Fire & Emergency Services ha Byrnihat kiba la wan mar-mar sha katei ka jaka.
Lyngba ka jingtrei shitom jong ki bor pulit ka Fire & Emergency Services kaba la neh kumba shi kynta shiteng, ïa ka met jong katei ka samla la ïoh ban sei noh na ka Wah Umtru bad la wanrah sha Nongpoh Civil Hospital na ka bynta ban pyndep ïa ka eksamin Post Mortem.
La ïoh jingtip ruh ba na ka liang u kpa jong katei ka samla hadien ba ïoh jingtip halor katei ka jingjia, u la leit ban kyrpad ïa ki bor pulit ka thanat Byrnihat ban pyllait na ka eksamin Post Mortem. Ïa kane ka jingkyrpad ka jong u, la pdiang da u Additional District Magistrate bad la aiti noh ïa ka met sha ki bahaïing hasem ba kin pyndep ïa ka jinglehniam khatduh ïa katei ka samla.
