Shillong, Nailar 13
U Bah Bindo M Lanong uba dei u nongseng ïa ka United Democratic Party (UDP) ha u snem 1997 u la pynpaw ba un sa pyrkhat da kaei ba un leh nangne shakhmat hadien ba u khlem shah jied shuh kum u nongaibuit jong ka UDP ha ka jingpynthymmai ïa ki nongkitkam ha ka General Council kaba la long ha ka 12 tarik mynta u bnai.
Haba ïakren bad u Bah Bindo u la ïathuh ba naduh ba u la don bynta ban thaw ïa ka UDP ha u snem 1997 haduh mynta ruh u dang dei u dkhot ka UDP. Hynrei, hadien ba ki la weng jyndat ïa u na ka kam nongaibuit jong ka seng (UDP) u la rai ban sa pyrkhat ha kine ki sngi.
U la ïathuh ba lashai ka sngi (ka 14 tarik Nailar) un phah noh da ka jingthoh sha ka seng UDP ban nym treh shuh ban pan tiket na ka seng ban ïakhun ïa ka ilekshon MP Lok Sabha ban long la shem snem.
U la ong ba ka jingkynrandien noh ka jong u (Bah Bindo) ban pan tiket ka dei namar naduh ba u la phah ïa ka shithi ha u bnai Jymmang mynta u snem, hynrei ki nongïalam ki khlem jubab eiei sha u.
“Nga rem ïa ka ilekshon MLA na Nongkrem constituency namar kiwei ki seng ki la kynthoh ba nga dei u trai ngam ïoh tiket, jin da la ki ai tiket nga la dei ban ïoh bun bha ki vote ha kane ka ilekshon ba dang shu dep” u la ong.
Nalor kata, u la ïathuh ba naduh ba u la leit ban ïakhun ïa ka ilekshon na Nongkrem ki nongkitkam ki la sdang ban leh kiar haduh ba wat ïa ka General Council ki khlem pyntip shuh.
Halor ka jingïoh nongkitkam thymmai ka UDP, u Bah Bindo um kwah ban ong eiei namar ïalade u la shah kyntait.
Haba ïakren bad u Bah Metbah Lyngdoh hadien ba u la shah jied biang kum u President ha ka sngi Saitjaiñ, u la ong ba u Bah Bindo u dang dei u dkhot ka UDP wat lada um shah jied shuh kum u nongaibuit ka seng.
U Bah Metbah u la ong ba ka jingbym shah jied shuh u Bah Bindo kum u nongaibuit ka dei ka jingbym ibit shuh ka Nomination Committee kaba la tyrwa ïa ki nongkitkam jong ka seng UDP.
Kum ban shu kdew, ka General Council jong ka UDP kaba la long ha ka sngi Saitjaiñ ka la mynjur ïa ka kyrteng u Bah Metbah Lyngdoh ban bteng biang kum u President, u Bah Jemino Mawthoh kum u General Secretary hadien ba ka Nomination Committee ka la wan ban tyrwa.
