Shillong, Nailar:
Khnang ban pynlong ïa ka thaiñ Shatei-lam-Mihngi ka thaiñ kaba bit ba biang ha ka jingdon jong ki briew kiba donsap bad kiba biang ban trei ha ki karkhana, u Dharmendra Pradhan, uba long u Myntri ka tnad Education and Skill Development and ka sorkar pdeng bad u G. Kishan Reddy, Myntri ka sorkar pdeng ba peit ïa ka tnad Culture, Tourism bad Development of North Eastern Region (DoNER) ki la pyllait paidbah ïa ka sienjam treikam ba la tip kum ka ‘Transforming Lives, Building Futures: Skill Development and Entrepreneurship in North-East’. Kum shi bynta jong kane ka sienjam treikam, 2.5 lak ngut ki samla na ka thaiñ Shatei- lam-Mihngi kin ïoh ïa ki jinghikai pyntbit ha ki kam kiba ïadei bad ki karkhana lyngba ki skhim bapher bapher bad ki sienjam treikam ba la wanrah da ka sorkar kynthup ruh ïa ka Pradhan Mantri Kaushal Vikas Yojana (PMKVY), National Apprenticeship Promotion Scheme (NAPS) bad ka Jan Shikshan Sansthans (JSS).
Ka sorkar ka la mang haduh 360-klur tyngka ka pisa na ka bynta ban kyntiew ïa ka roi ka par, ban hikai pyntbit ïa ki sap ki phong, bad ban kyntiew ruh ïa ka ïoh ka kot ha ka imlang sahlang ha ka thaiñ. Khnang ban kyntiew ïa kane ka kam, la shim ïa ki sienjam kiba ïadei bad ka jingai jinghikai ha kiba bun ki liang treikam bad ai jinghikai ruh ban nang pyntbit shuh shuh ïa ki sap ki phong jong ki samla khnang ba yn lah ban pyndap ïa ka jingdonkam ïa ki briew kiba tbit ban trei ïa ki kam rep kam riang, kam jngohkai, ki kam shna ïa ki tiar shna kti, bad ha ka liang ka Information Technology ne ki buit teknologi kiba ïadei bad ki lad pathai.
Ha katei ka lympung jingïalang la ïoh ïa ka jingkren na u Dharmendra Pradhan, Myntri ka tnad Education, Skill Development and Entrepreneurship, ka sorkar India, u G Kishan Reddy, Myntri ka tnad Tourism, Culture and Development jong ka thaiñ Shatei-lam-Mihngi, ka sorkar India, u Rajeev Chandrasekhar, uba long u Myntri khynnah jong ka tnad Skill Development and Entrepreneurship, Electronics bad IT, Jayanta Mallabaruah, Myntri ka tnad Public Health Engineering, Skill Development Employment & Entrepreneurship bad Tourism, ka sorkar Assam. U Maotoshi Longkumar, uba long u MLA, kumjuh ruh u Advisor ka tnad Labour, Employment, Skill Development & Entrepreneurship bad Excise, ka sorkar Nagaland, Bhim Hang Limboo, Public health engineering and Water security, Water resources & River Development, Skill Development & Entrepreneurship, ka sorkar Sikkim, Atul Kumar Tiwari, Secretary, ka Ministry of Skill Development and Entrepreneurship.
