Shillong, Nailar 13
Ka Sorkar Jylla lyngba ka tnat pynroi nongkyndong ka dang thawlad ban mang pisa biang sha man la ki block na ka bynta ban siang rong ïa ki surok da kaba pynïasoh lang bad ka skhim bylla sngi ka National Rural Employment Guarantee Scheme (NREGS).
Bun ki surok ïaid kali ha ki shnong ki thaw ki dei kiba la shna lyngba ka NREGS ki dei kiba la siang da ka dewbilat.
Ha ki snem ba mynshwa, ka Sorkar Jylla ka la mang ïa ka tnat pynroi nongkyndong da kaba bhah T.50 lak ïa kawei ka block na ka bynta ban siang rong ïa ki surok kiba la shna lyngba ka skhim NREGS.
Haba kylli na u Myntri ka tnat pynroi nongkyndong u AT Mondal, u la ong ba ka Sorkar ka dang thawlad ban mang pisa biang sha ki block khnang ban lah pyntreikam da kaba pynwan lang hajuh ïa ka pisa kaba mang sha ki block bad ka skhim bylla sngi (NREGS) na ka bynta ban siang rong ïa ki surok ha ki shnong ki thaw.
U Mondal u la ong ba ka NREGS ka dei kaba ki paidbah ha nongkyndong ki la myntoi bha bad lada lah ban mang pisa lang sha man la ki block ban siang surok rong kan long ka jingmyntoi ïa ki shnong ki thaw ha nongkyndong.
