Shillong, Nailar 13
U Bah Granary S. Thangkhiew, para jong u nongïalam barim ka Hynñiewtrep National Liberation Council (HNLC), Bah Cherishstarfield Thangkhiew (Bam Kwai ha Dwar U Blei) u la kyntu ïa ki dkhot ka seng (HNLC) ba kim dei ban pyndem satia hakhmat ki bor jong ka Sorkar Jylla.
U Bah Thangkhiew u la ong ïa kane ha ka Sngi U Blei haba ai jingkren ha ka jingïalang lyngkot ha u lum jingtep ban kynmaw burom ïa ka lyngkhuh sngi ïap kaba 2 snem jong u Bah Cherish.
“Nga shu kwah pynkynmaw kaei kaba la jia ïa u hynmen jong nga ha ka 13 tarik Nailar, 2021 – ka dei ka jingjia kaba ngim poi pyrkhat kum ka ïing ka sem ha kaba nga lah ban ong ba ki lehnoh ïa kiba la siew tulop da ka Sorkar u Conrad Sangma hapoh ka jingïalam u Superintendent of Police (SP), East Jaiñtia Hills, u Jagpal Singh Dhanoa, ki la wan ban dkhat jubor ïa ka jingim u hynmen jong nga ha ka miet shiteng synñia (13 tarik, Nailar, 2021), hapdeng ka jingdum jong ka miet,” la ong u Bah Thangkhiew.
Haba kdew ba ki la rung bad dkhat jubor ïa ka jingim u Bah Cherish khlem da ailad ïa u ban ïakren ne ïasaid ïalade, u la ong ba kitei ki briew ym tang ba ki la dkhat ïa ka jingim jong u Bah Cherish, hynrei ki la pynjulor ïa ka ïing ka sem bad shoh ruh ïa 2 ngut ki khun jong u.
“Kane ka dei ka sngi kaba kum ka jaidbynriew baroh kawei kan sah kynmaw ïa ka jingleh donbor jong ki lehnoh Sorkar bad kiba la dkhat im-im peit-peit khlem da kheiñ shuh ïa ka jingim briew,” u la ong da kaba kyntu ba kum ka jaidbynriew, “dei ban ïatylli kawei lym kumta kin sa shu dkhat beit ïa ka jingim na ka por sha ka por, iwei hadien iwei.”
U la ong ruh, “Kat kiba leh nongïalam, kin pynleit beit. Ngi sngewthuh ba dei kaei-kaei kaba rieh jongno-re-jongno – ngim lah ban batai bad ban pyntroiñ ïa ka jaidbynriew ki leh da kiba bun rukom.”
U la pynsngew ba kum ka jaidbynriew ka dang donkam ïa u Bah Cherish naba u long uba proh jabieng bad namarkata ki bor Sorkar ki sheptieng ban shu kem im ïa u bad na kata ka daw ki la shim noh ïa ka jingim jong u.
“Ki dkhot ka seng (HNLC) kiba wan ïakren ïasuk bad ka Sorkar, khublei shibun ïa ka jingdon ryngkat jong phi bad ngi kyrkhu kyrdoh bad buh jingduwai ba kaei-kaei ka kam kaba phi leh, ngi kyrmen ba kan long kaba jop bad ba phin ym pyndem ha ki bor jong ka Sorkar. Ngi kyrmen ban phin poi sha ka thong. Ngi ruh ngin don ryngkat bad ngin buh jingduwai kum u paid ka Bri U Hynñiewtrep ba phin poi sha ka jingjop,” u la ong.
Ha kane ka sngi ka la don ruh ka jingbuh syntiew ha u lum jingtep jong u Bah Cherish ba la ïashim bynta da ki bahaïing hasem, ki nongïalam sengbhalang bapher-bapher, nalor ki dkhot ka HNLC hapoh ka jingïalam u Vice-Chairman, Bah Manbhalang Jyrwa.
Kum ka dak ka jingburom ïa u nongïalam barim, ki dkhot ka seng ki la tap ïa u lum jingtep da ka lama ka HNLC ha shuwa ban aiti ïa ka (lama) ha ka kurim u Bah Cherish.
