Shillong, Nailar:
Ka seng Hynñiewtrep Achik National Movement (HANM) ha ka Sngi Balang ka la leit ban ïakynduh ïa u Chief Executive Member (CEM) ka Khasi Hills Autonomous District Council (KHADC), u Bah Pynïaid Sing Syiem ban dawa na ka KHADC ba ym tang ban nym ai Labour License lane Trading License pathar ïa ki bar jylla, hynrei ban nym pynthymmai shuh ïa ki Trading License bad Labour License jong ki.
Haba kren sha ki lad pathai khubor hadien ka jingïakynduh ïa CEM, u President ka HANM, u Bah Lamphrang Kharbani u la ong ba ka jingdawa jong ka seng na ka KHADC ban nym pynthymmai shuh ïa ka Trading License bad ka Labour License ka dei namar ka jingjyllei eh jong ki bar jylla hapoh kane ka ri ka la long kaba ima haduh katta katta.
U Bah Kharbani u la ong ba kane ka jingjyllei jong ki barjylla hapoh kane ka jylla ym tang ba ka la ktah ïa ka kamai ka kajih jong ki trai ri trai muluk hynrei kiba bun ki kam sniew ruh ki la jyllei bha.
“Na ka liang ka seng, ngi la ai jingmut ba kum ka Jaitbynriew ngim kwah ba ka jylla Meghalaya kan long kum ka jylla Tripura ha kaba ki trai shnong kin sa kylla long ki rit paid”, la ong u Bah Kharbani.
U Bah Kharbani u la ong ba ki bar jylla ynda ki la bun paid ki la sdang sa ban pynibor namar wat mynta ba ki dang duna paid ruh ki la pynibor haduh katta katta da kaba shoh ïa ki samla Khasi bad lada kan poi ka por ba kin bun paid, khlem pep kin sa dawa ïa ka hok jong ki bad ka jylla Meghalaya kan sa jia kumba jia ha Manipur.
“Kum ka seng kaba don ïa ka jingkitkhlieh na ka bynta ka pateng jong ka Jaitbynriew bad ka pateng ka ban sa wan, ngi la kyntu da kaba tyngeh ïa ka KHADC ba ka dei ban shna da ki aiñ kiba khlaiñ”, la ong u Bah Kharbani.
Shuh shuh u Bah Kharbani u la ong ba lada ka council ka pyrshang noh da ki lad ki lynti bathymmai kumba ka seng ka la ai jingmut ha katei ka sngi, kan long ruh kawei ka jingpynrit mynsiem ïa ki bar jylla ba kin wan hapoh ka ri jong ngi namar ba kim ïoh shuh ïa ka Trading bad ka Labour License.
