Shillong, Nailar 14
Kum shi bynta ban kyntiew ïa ki kam jngohkai hapoh ka jylla, ka Sorkar Meghalaya ka la pynkhreh ban pynlong ïa ki tamasa bapher bapher ki ban sdang naduh ka 12 tarik u Risaw.
Ïa kane la pynbna da u Myntri ka tnat ki kam Jngohkai ka jylla u Bah Paul Lyngdoh ha ka sngi Nyngkong, ha kaba u la ong, ka jingthmu ba hakhmat lyngba kine ki tamasa bapher bapher ka long ban lah kyntiew ïa ki kam jngohkai pyrthei ha kylleng ki bynta jong ka jylla.
Ïa kane ka tamasa yn sdang nyngkong da kaba pynlong ïa ka Megha Kayak Fest kaba lai sngi kata naduh ka 12 haduh 14 tarik u Risaw ha shnong Umtham, Ri-Bhoi District. Hadien kane yn pynbud pat sa ka Shillong Literary Festival kaba lai sngi ha nongbah Shillong naduh 14 haduh 16 tarik u Naiwieng.
Katba ïa ka Shillong Cherry Blossom Festival, kaba dei kawei na ki tamasa kaba la khring bha ïa ki paidbah ha ki snem ba la dep, yn pynlong ha ka 17 haduh 19 tarik u Naiwieng. Ha kane ka kynti ba mynta, ïa kane ka tamasa yn pynlong ha Ri Bhoi district.
Halor ka jingkylli ba bun ki kynthoh jur ban pynlong ïa ki tamasa, u Myntri u la ong, ba ki nongkynthoh kin don beit ha man la ki jaka, hynrei ïa ka jylla Meghalaya la tip ruh kum ka Music Capital jong ka ri.
“Ha ka jingshisha, bun ki nongtem nongrwai ki shem jingeh ban kamai jakpoh namar ka jingduna palat ki lad, mynta ngi la ai ïa katei ka rynsan jong ka jingailad bad jingmyntoi bad kane kan ym leit tang sha ki kynhun kiba pynlong ïa ka tamasa ne ki nongrwai ne nongtem kiba ïashimbynta ha katei ka rynsan hynrei kin don ruh bun ki ban ïoh jingmyntoi lyngba kitei ki tamasa,” la ong u Bah Paul.
Kiwei pat ki tamasa ki ban sa pynlong ki kynthup ïa ka Me.Gong Festival, ka Winter Tales Festival bad ïa ki tarik na ka bynta kine ki tamasa yn sa pynbna kham hadien.
