Shillong, Nailar 14
Hadien ka jingïoh ring dur lyngba ka ‘video’ ïa arngut ki briew kiba la shong hadien ka jaka bret ñiut ha Motphran bad kiba dang injek drok, na ka liang ka Seng Samla Mawkhar ka la ong ba ki Dorbar Shnong, ki bor jong ka aiñ bad ka sorkar ki hap ban ïatreilang ban rat dyngkhong ïa utei u jingdih pynbuaid napoh ka shnong bad napoh ka jylla hi baroh kawei.
Haba kren sha ki lad pathai khubor ha ka Lah Sngi U Blei, na ka liang u President ka Seng Samla Mawkhar, u Bah Daniel Syngai u la ong ba tang ka seng samla kan nym lah ban leh eiei, hynrei da ka jingïatreilang jong baroh kum kawei ka kynhun yn sa lah ban rat dyngkhong ïa u drok napoh ka jylla.
“Ka seng samla ha kajuh ka por ngi sngew ba ym dei tang ka seng samla, hynrei ki dorbar shnong bad ki bor jong ka aiñ, ki hap ban ïatreilang, lada ngi ïatreilang kum kawei ka kynhun, ngi lah ban rat dyngkhong ïa u drok napoh ka jylla ka jong ngi”, la ong u Bah Daniel.
Nangta, u Bah Daniel u la ong ba lyngba ka jingïohi ïa katei ka video, ka Seng Samla da ka jingthmu bad da ka jingïatreilang bad ka kompani kaba la tip kum ka NRE Pageant India Private Limited kin sa pynlong da ka jingpynsngewthuh paidbah halor u drok. Kane ka jingpynsngewthuh paidbah ka long ruh halor kumno ban ïarap ïa kiba la kyrni ha ka jingdih drok ba kin lait na ka jingkwah ban dih ïa u drok. Ïa kane ka prokram yn pynlong ha ka 19 tarik mynta u bnai naduh ka por 10 baje mynstep ha Community Hall jong ka Mawkhar.
Na ka liang u President ka NRE Pageant India Private Limited, Bah Ransom Sutnga, u la ong ba katkum ka jingwad bniah ka jong u, ka jingngop jong ki samla ha u drok ka dei namar ba kitei ki samla kim da biang eh ha ka kam ka jam.
U Bah Sutnga u la ong ba ka Motphran ka dei ka jaka kaba jia bun ki jingjia kiba sniew bad ka long kaba eh ïa ka shnong ba kan tuklar eiei namar kam hap shuh hapoh u pud u sam jong ka Mawkhar.
“Hynrei lada ka dei hi kaba jia hapoh ka shnong ka thaw, ïa kata ngi hap hi ban shim khia, hynrei wat la katta ngin nym kut hangta hynrei ngin wad hi ki lad ki lynti kumno ban rat dyngkhong ïa u drok”, la ong u Bah Sutnga.
