Shillong, Nailar 14
Kum shi bynta ka jingrakhe ïa ka jingdap 25 snem jong ka Seng Samla Mawkhar, ka Seng Samla Mawkhar ha ryngkat ka jingïatreilang bad ka NRE Pageant India Private Limited, ka la shim ïa ka sienjam ban pynlong da ka jingïalap pynsngewthuh paidbah halor ka jingsniew jong u drok bad ki lad ki lynti kumno ban pyllait ïa ki nongkyrni na une u jingdih lyngba ka jingpyndonkam da ki dawai kynbat.
Ïa katei ka prokam kaba la tip kum ka “Drug Awareness and Solution For The Addicts Through Herbal Remedies” yn pynlong ha ka 19 tarik mynta u bnai naduh ka por 10 baje mynstep ha Community Hall jong ka Mawkhar.
Haba kren sha ki lad pathai khubor, u Bah Daniel Syngai, President Seng Samla Mawkhar u la ong ba kum ka seng samla ka dap shisha da ka mynsiem ka jingsngewkhia ban ïohi ba kiba bun ki khynnah samla ki la ngop ha ki jingdih pynbuaid lyngba u drok. Kumta lyngba kane ka prokram kan ai jingïarap ïa ki khun samla ba kin lait na ka jingkyrni na utei jingdih pynbuaid.
U Bah Daniel u la khot sngewbha ruh ïa ki Dorbar Shnong kiba don markhap bad ka Dorbar Shnong Mawkhar kiba kynthup ïa ka Dorbar Shnong ka Mission Compound, ka Wathapbru, ka Umsohsun, ka Wahingdoh, ka Riatsamthiah, ka Jaïaw Shyiap, ka Jaïaw Upper Lansonalane, ka Jaïaw Laitdom, ka Jaïaw Langsning bad ka Jaïaw Pdeng ba kin wan ïashimbynta bynta lang ha katei ka sngi.
“Na ka liang jong ka seng samla, ngi da kyntu kyrpang ïa kine ki longïing kiba mad ïa kane ka jingeh ba lyngba kane ka jingwan jong ki sha kane ka prokram ka lah ban ai ka jingïarap ïa ki,” la bynrap u Bah Daniel.
Na ka liang u Bah Ransom Sutnga uba dei u President jong ka NRE Pageant India Private Limited, u la ong ba na ka liang ka kompani ka long kaba kloi ban ïadon ryngkat lang ban ai ka jingkyrshan lem ha kaba ïadei bad katei ka prokram. Nangta u la ong ba katei ka prokram kam dei tang ka prokram pynsngewthuh paidbah halor ka jingsniew jong u drok, hynrei ka dei ruh kumno ban ai ïa ka lad jingïada ïa kiba kyrni ha u drok da kaba pyndonkam da ki dawai kynbat ki ban lah ban shna hi ha la ki ïing ki sem. Ïa ka jinghikai ha katei ka sngi yn ai da u Tenzing Tsering uba dei u Ayurvedic Practioner na New York.
Na ka liang u Tenzing Tsering u la ong hadien ka jingïoh jingtip ba kiba bun ki samla ka jylla ki la ngop ha u drok, ka la pynlong ïa u ba un don ka mynsiem kitkhlieh ban leh eiei ban pyllait ïa ki samla na kane ka jingkyrni. Namar haba ki samla ki la kyrni ha ka jingdih drok ka pynsniew lut ïa ka ïing ka sem, ka roi ka par, ka jylla bad ïa ka imlang ka sahlang hi baroh kawei.
