Shillong, Nailar 14
Ka kynhun kieng atiar ka Jylla, ka Hynñiewtrep National Liberation Council (HNLC) ha ka Lah Sngi U Blei ka la ïoh ban rakhe laitluid ïa ka ‘Raising Day’ kaba 36 da kaba pynher ïa ka lama jong ka seng ha IB ka MeECL, Sumer, Ri-Bhoi District.
Kane ka dei ruh ka sien kaba nyngkong ba ka kynhun ka ïoh ban rakhe laitluid ïa ka jingdap 36 snem hapoh ka Jylla khlem kino-kino ki jingteh kyndon.
Ki dkhot ka seng hapoh ka jingïalam u Vice-Chairman, Bah Manbhalang Jyrwa ki la rakhe ïa kane ka sngi kyrpang ha ka jaka sah jong ki ha IB ka MeECL, Sumer, Ri-Bhoi District.
Na ka liang u Bah Jyrwa u la shim ïa ka ‘Salute’ ha ka por ba pynher ïa ka lama jong ka HNLC ha ryngkat ka jingdonlang kiwei-kiwei ki dkhot ka seng.
Ha kane ka sngi, ki dkhot ki la rwai ruh ïa ka jingrwai ‘Ri-Hynñiewtrep’ ha ka por ba dang shim ïa ka ‘Salute’.
Kum ban shu kdew hangne, ka dei ruh ka sien kaba nyngkong ha kaba ka seng ka la ïoh ban leh burom ïa u nongïalam barim, Bah Cherishstarfield Thangkhiew (Bam Kwai ha Dwar U Blei) ha ka lyngkhuh sngi ïap kaba 2 snem jong u ha ka Sngi U Blei.
Ha katei ka sngi, nalor ki bahaïing hasem bad ki nongïalam sengbhalang bapher-bapher, ki dkhot ka HNLC hapoh ka jingïalam u Vice-Chairman, Bah Manbhalang Jyrwa ki la ïoh ban ïashim bynta lang ha ka jingbuh syntiew kaba la long ha u lum jingtep jong u Bah Cherish ha Lawmali.
Kum ka dak ka jingburom ïa u nongïalam barim, ki dkhot ka seng ki la tap ïa u lum jingtep da ka lama ka HNLC ha shuwa ban aiti ïa ka (lama) ha ka kurim u Bah Cherish.
Ki dkhot ka seng ki la wan sha ka Jylla ha u snem ba la dep ban ïashim bynta ha ka jingïakren ïasuk bad ka Sorkar Pdeng kumjuh ka Sorkar Jylla.
Ka HNLC ka la thung ruh ïa u President ka Hynñiewtrep National Youth Front (HNYF), Bah Sadon K. Blah kum u ksiang jong ka seng na bynta ban ïaid shakhmat bad ka jingïakren ïasuk.
