Nongpoh, Nailar 14
Ka kynhun ki nongïalam bad dkhot jong ka Synjuk ki Seng Samla Shnong (SSSS) jong ka Ri Bhoi District ha ryngkat ka jingïatreilang bad ka HDFC Bank, Nongpoh Branch ha ka Sngi Nyngkong ki la pynlong ïa ka jingai snam sngewbha lane kata ka Blood Donation Drive ha ka Blood Bank jong ka Civil Hospital Nongpoh kum shi bynta na ka jingshakri ïa ka imlang ka sahlang.
Ïa kane ka kynhun jong ka SSSS Ri Bhoi District la ïalam da u samla Banphrang Syiem, Adviser, u samla Aristone Ryndongsngi, Chairman ha ka jingïadon ryngkat u nongïalam ba rangbah ka synjuk, u samla Vanshan Buhphang, Chairman ka SSSS Sengkmie.
Haba kren sha ki lad pathai khubor hadien ka jingai snam sngewbha, u samla Aristone Ryngdongsngi u la ïathuh ba kane ka dei ka sien kaba nyngkong eh ba ka SSSS Ri Bhoi District ka la shim ïa ka sienjam ban noh synñiang ïa la ka snam kum kawei na ki kam ban ai ïa ka jingshakri sha ki paidbah.
U la ong ruh ba kum uwei na ki briew ba ju ai snam man la ka por, ka jingai snam ym tang ba ka ïarap ban pynim ïa ki mynsiem briew kiba donkam snam kyrkieh, hynrei ka ïarap ruh ban ïoh ïa ka met ba shait ba khlaiñ, bad pynshisha ruh ba kam don satia kano-kano ka jingma haba leit ban ai snam.
