Nongstoiñ, Nailar 14
Ka jingïaid shaid-shaid shakhmat ban pyntrei ïa ka karkhana kaba dang mih thymmai ha Riwiang, West Khasi Hills ïa kaba la tip ruh kum ka M/S MD Ferro Alloys khlem da pynlong ïa ka public hearing, ka la pynlong ïa ka Hynñiewtrep Youths’ Council (HYC), West Khasi Hills District ba kan pyrshah jur.
Halor kane na ka liang ka HYC ha ka Sngi Nyngkong ka la leit ban buh ïa ka jingujor sha u Deputy Commissioner ka West Khasi Hills, ha kaba ka la pynpaw ruh ïa ka jinglyngngoh ban tip ba ka karkhana M/S MD Ferro Alloys jong u Bah Donboklang War ha shnong Mawlait-Nonglum ka la ïaid shaid-shaid shakhmat ban pyntrei ïa kane ka karkhana ha shnong Sohlad Umjaru, Rwiang Nongstoiñ Syiemship khlem ka jingpynlong ïa ka Public Hearing, ha kaba la shu buh ïa kane ka karkhana.
Ki nongïalam ka HYC ki la ong ba katkum ki kyndon ha shwa ban seng ïa kano-kano ka karkhana donkam ban khot shwa ïa ka Public Hearing, ka jingmynjur jong ki khun shnong ne ki khun hima sa buh ïa kano-kano ka karkhana.
Kumta ka HYC ka pyrshah jur ïa ka jingthmu ban buh ïa kane ka karkhana khlem ka jingmynjur ki khun shnong khun hima lyngba ka Public Hearing.
Shuh shuh ki la pynpaw ruh da kaba ong, “Ngim lah ban pdiang bad ngi dawa na u DC ban pynlong ïa ka hearing ha shwa ban ïaid shakhmat ïa katei ka karkhana”.
Na ka liang ki nongïalam ka HYC ki la ong ruh ba na ka liang u DC u la ïathuh ba ïa mynta ïa katei ka karkhana la pynsangeh namar ka jingbym pat biang ha kaba ïadei bad ki kyndon jong ka Pollution Control Board.
