Shillong, Nailar 14
Ka jingai jinghikai ïa ki samla pule Undergraduate kiba dei nabar jong ka jylla Manipur kiba pule hapoh ka College of Agriculture, Imphal bad College of Food Technology, Imphal jong u snem pule 2020–2021, 2021–2022, bad 2022–2023 yn sa ai lyngba ka ‘online’.
Kane ka jingai jinghikai da ka ‘online’, ka dei katkum ka rai kaba la shim da ka Central Agriculture University (CAU), Imphal.
Ïa ka hukum kaba ïadei bad kane, la pynmih ha ka 14 tarik mynta u bnai namar ka jinglong jingman hapoh ka jylla Manipur bad ruh halor ka jingkyrpad ba la ïoh pdiang na ki kmie ki kpa jong ki samla pule bad ruh na ki heh sorkar.
Ha ka kyrwoh, u Registrar ka CAU Imphal u TR Sharma u la pyntip ba nalor kane, wat kito kiba pule bad pyntbit ha ka Masters bad PhD ruh hapoh ka College of Agriculture, Imphal kin hap ban leh da ka ‘online’.
Ka program RAWE jong u snem 2020-21 na ka bynta ki samla pule B.Sc Agriculture yn pynlong ha ki jylla ki jong ki.
Katba ki samla pule M.Sc bad PhD jong ka College of Agriculture, Imphal kiba la pyndep ïa ki course work ki dei ban pyndep ne bteng ïa ka jingwad bniah ka jong ki, ha ki College of CAU kiba don hajan, ki ICAR institute ne KVK ha ki jylla ki jong ki.
