Shillong, Nailar 14
Ka Meghalaya Pradesh Mahila Congress (MPMC) ha ka Lah Sngi U Blei ka la pynlong da ka jingthang mombati ha Khyndailad ban pynrem jur ïa u Myntri Rangbahduh ka ri, u Narendra Modi uba la kiar bad leh kyllut halor ka jingïakynad bad ka jingshah leh be-i-jot jong ki kynthei ba lui-lui ha Manipur.
“Ka jingwan jong ngi hangne mynta ka sngi ka dei namar ka jingleh kyllut bad jingleh matlah jong u Myntri Rangbahduh ka ri, u Narendra Modi halor ka jingïakynad bad ka jingshah leh be-i-jot ki kynthei ha Manipur,” la ong ka President ka MPMC, Kong Joplin S. Shylla haba kren sha ki lad pathai khubor.
Haba kdew ba u Myntri Rangbahduh um shym la leh eiei wat la ka jingïakynad ka la poi sha ka 104 sngi, ka la ong ba kum u Myntri Rangbahduh ka ri India u don bor ban pynsangeh, ban peit ban khmih hynrei haduh mynta wat hadien 104 sngi ruh, um shym la leh eiei.
“Ki kynthei ki la shah pynïaid lyngkhuit…shah leh be-i-jot, hynrei u leh matlah bad leh kyllut,” ka la ong.
Ka President ka la ong ruh ba kane ka dei ban pynkyndit bynriew ïa ka Meghalaya kum ka Jylla ha ka Thaiñ Shatei Lam Mihngi bad buh jingkylli ba lada u Myntri Rangbahduh u ieh noh beiñ ïa ka thaiñ, yn jia aïu lada kum kane ka jingjia ka wan jia ha ka Jylla.
Haba kylli, ka la ong, “Hooid, u peit beit beiñ ïa ka Thaiñ Shatei Lam Mihngi, kumno phin ong ba u nym peit beiñ…ka jingïakynad katne ka la jia ha Manipur…u leit pynban shabar ri. Tangba hapoh ka thaiñ, wat hadien ba u la wanphai, um pat leit ïuh kjat ne tem ïa ka jingïakynad ha Manipur.”
Haba kren halor ka jingburom ïa ki jait niam bapher-bapher hapoh ka ri, ka Kong Shylla ka la ong, “Ngi burom ïa kano-kano ka jait niam, ngim ibeiñ ïa kano-kano ka niam hynrei kiwei ruh ki dei ban burom ïa ka niam jong ngi. Ha Manipur lehse lah ban dei ba ki ai lad ban pynpait pynpra ïa ki ïingmane…ym tang ha Manipur hynrei kylleng sawdong ka India.”
Shuh shuh haba pynkynmaw ïa ka jingshah thombor ki Khristan ha kylleng ka ri, ka la ong ba kam long shuh kaba shong shngaiñ ïa ki Khristan ha India.
