Shillong, Nailar 14 (UNI)
U nongrwai ‘Pop’ ba pawnam ka Ireland, u Ronan Keating, un sa ïashim bynta ha ka tamasa dienglieng ne ‘Cherry Blossom Festival’ ka ban sa long ha ka Jylla ha u Naiwieng.
Haba pynbna ïa ka almanak jong ki kam jngoh kai ne ka ‘Tourism Calendar’ ha ka Lah Sngi U Blei, u Myntri ka tnad ki kam jngoh kai pyrthei, Bah Paul Lyngdoh u la ong ba u Ronan Keating u la pyntikna ban ïashim bynta ha ka ‘Cherry Blossom Festival’ kaba la pynbeit ban long naduh ka 17 haduh ka 19 tarik Naiwieng mynta u snem.
Nalor utei u nongrwai ba pawnam ka Ireland, u Bah Lyngdoh u la ong ba kiwei-kiwei ki ’riew don sap ha ka liang ka rwai ka siaw, ka put ka tem ki ban ïashim bynta lang ha katei ka tamasa ki kynthup ïa u Jonas Blue, Pink Panda, Hybrid Theory bad Kenny Musk.
U la pynbna ruh ba ka jaka ban pynlong ïa ka ‘Cherry Blossom Festival’ kan dei ha Ri-Bhoi District ban kiar na ka jingkhapngiah ha ka nongbah.
U Bah Lyngdoh u la ong ruh ba ha kane ka kynti kan don ka ‘e-ticket’ khnang ban kner sha kiwei-kiwei ki bynta jong ka pyrthei. Ka tnad kam jngoh kai pyrthei ka khmih lynti ban don ka jingkiew ha ka jingwan ki nongwan jngoh kai, ha kawei ka liang ka ban khyllie ïa ka jingduhnong jong u snem ba la dep.
Ïa ka ‘Cherry Blossom Festival’ lem bad kiwei-kiwei ki tamasa la pynsangeh noh shuwa ha u snem ba la dep namar ka jingïasiat ha Mukroh.
Ki paidbah kiba la thied ïa ki tiket na bynta katto-katne tylli ki tamasa la hap pynphai noh ïa ka pisa sha ki.
Shuh shuh ki don kumba 12,000 ngut ki briew kiba la ïoh biang ïa ka pisa bad ka tnad kam jngoh kai pyrthei lem bad kiwei-kiwei ki ‘agency’ ki la mad ïa ka jingduhnong kaba kumba T.3-4 klur namar ka jingpynsangeh ïa ki tamasa.
Nalor kane, u Myntri u la bynrap ba ka Jylla ka la sakhi ïa 15 lak ngut ki nongwan jngoh kai pyrthei ha u snem ba la dep bad ka Sorkar ka khmih lynti ba kane kan nang kiew shuh-shuh mynta u snem lyngba ki tamasa bapher-bapher.
